БЙД ўзининг илк одамсимон роботларини намойиш этади
Мутахассислар фикрича, компаниянинг улкан ишлаб чиқариш қувватлари уни бозорнинг асосий ўйинчиларидан бирига айлантириши мумкин.
БЙД ўзининг биринчи одамсимон роботларини тақдим этади
Дунёдаги етакчи электромобил ишлаб чиқарувчилардан бири бўлган БЙД август ойида ўзининг илк одамсимон роботларини намойиш этишга тайёрланмоқда. Тақдимот компаниянинг Ди Спасе кўргазма марказида бўлиб ўтади, унда ташриф буюрувчилар роботлар билан бевосита мулоқот қилиш имкониятига эга бўлишади.
Маълум қилинишича, бу шунчаки консептуал моделлар эмас, балки реал вазифаларни бажаришга қодир тўлақонли роботлардир.
БЙД компанияси сунъий интеллект ва одамсимон роботлар йўналишини 2025-йилда ўрганаётгани маълум бўлган эди. Компания ижрочи вице-президенти Стелла Лининг сўзларига кўра, БЙД сунъий интеллектни ривожлантиришга сезиларли сармоя киритган.
Экспертларнинг фикрича, компаниянинг асосий афзаллиги роботларнинг ўзида эмас, балки уларни катта миқдорда ишлаб чиқариш салоҳиятида. Мутахассислар БЙДнинг улкан ишлаб чиқариш қувватлари уни бозорнинг асосий иштирокчиларидан бирига айлантириши мумкинлигини таъкидламоқдалар.
Дастлаб, роботлар компаниянинг ўз заводларида қўлланилади. Улар деталларни ташиш, маҳсулотларни йиғиш, сифат назоратини амалга ошириш ва ички логистика жараёнларини автоматлаштириш каби вазифаларни бажаради. Бу эса технологияларни ҳақиқий иш шароитида синовдан ўтказиш ва такомиллаштириш имконини беради.
Агар роботларнинг самарадорлиги амалда исботланса, уларнинг қўлланилиш соҳаси кенгаяди. Келажакда одамсимон роботлар омборлар, шифохоналар, меҳмонхоналар, савдо марказлари, қурилиш соҳаси ва уй-рўзғор ишларида хизмат кўрсатиши мумкин.