Британиялик 97 ёшли кўзи ожиз аёл самолёт қанотида учиб рекорд ўрнатди (видео)
Британиялик 97 ёшли кўзи ожиз аёл самолёт қанотида учиб, рекорд ўрнатди.
Буюк Британияда яшовчи 97 ёшли Бетти Бромиж парвоз қилаётган самолёт қанотида учиш орқали ўзининг шахсий Гиннес рекордини янгилади. У бу натижани қайд этган дунёдаги энг кекса аёлга айланди. Нафақадаги аёл сўнгги ўн йил ичида бундай хавфли парвозни олти марта амалга оширган.
Даилй Маил нашрининг хабар беришича, Челтнем шаҳрида истиқомат қилувчи Бетти 2025-йилнинг август ойида инсултни бошдан кечирган. Шундан сўнг у яна ўзининг экстремал саргузаштларига қайтган. Нафақахўр аёл касаллик унинг нутқига таъсир қилганини, аммо янги синовлардан воз кечмаганини тан олди.
"Кўзим деярли кўрмайди, бу эса ҳаётни қийинлаштиради. Ҳатто ўқий олмайман: телефонимга хабарлар келади, лекин уларнинг кимдан эканини кўра олмайман. Бу жуда алам қилади. Шунинг учун қўлимдан келган ишни қилишни хоҳлайман", дейди Бетти.
Британиялик аёл учун энг қийин босқич бўйи пастлиги сабабли самолётга чиқиш бўлди. Унинг сўзларига кўра, парвоз аттраксионлардан кўра камроқ қўрқинчли кечган. Рекордчи 100 ёшлик юбилейи учун алоҳида синов ўйлаб топишни режалаштирмоқда.
Бетти Бромиж ушбу парвозини ўзи даволанган Челтнем касалхонаси учун маблағ йиғишга бағишлади. Йиғилган хайрия пуллари касалхона беморлари ва ходимлари учун тиббий ускуналар сотиб олишга сарфланади.