Австрия ҳарбий хизмат тизимини ислоҳ қилмоқда
Австрия ҳукумати мажбурий ҳарбий хизмат муддатини олти ойдан тўққиз ойгача узайтиришни назарда тутувчи ислоҳотни маъқуллади. Янги тартибга кўра, асосий тайёргарликдан кейин мажбурий дала машғулотлари жорий этилади. Ҳукумат бу ўзгаришларни Европа хавфсизлик муҳитидаги ўзгаришлар, жумладан Россиянинг Украинага қарши уруши билан изоҳламоқда.
Австрия ҳукумати мамлакатдаги мажбурий ҳарбий хизмат тизимини ислоҳ қилиш бўйича келишувга эришганини 27-июл куни расмийлар маълум қилди.
Узоқ давом этган музокаралардан сўнг, ҳукмрон коалиция – Австрия Халқ партияси (ÖВП), Социал-демократик партия (СПÖ) ва либерал Неос партияси – ҳарбий хизмат муддатини уч ойга узайтиришга келишиб олди.
Ислоҳотга кўра, чақирилувчилар дастлаб олти ойлик базавий ҳарбий тайёргарликдан ўтади. Шундан сўнг, улар учун қўшимча мажбурий дала машғулотлари жорий этилади. Бу машғулотларни захира қўшинлари таркибида хизмат қилувчилар ўн йил давомида исталган вақтда ўташи мумкин бўлади.
Ҳукуматнинг таъкидлашича, таклиф этилаётган босқичма-босқич тизим экспертлар комиссияси тавсияларига асосланган.
Ислоҳот доирасида ҳарбий хизматни ёшлар учун янада жозибадор қилиш чоралари ҳам кўзда тутилган. Хусусан, ҳарбий хизматчиларга таътил кунлари берилиши режалаштирилмоқда. Шунингдек, хизмат даврида тўланадиган ойлик нафақа 1000 еврогача оширилади.
Австрия канслери Кристиан Штокернинг сўзларига кўра, мамлакат мудофаа салоҳиятини кучайтириш зарурати Европа хавфсизлик муҳитидаги ўзгаришлар билан боғлиқ. У Россиянинг Украинага қарши уруши, киберҳужумлар, гибрид таҳдидлар ва муҳим инфратузилмага қарши хавфлар хавфсизлик сиёсатига янгича ёндашувни талаб қилаётганини айтди.
Канслернинг таъкидлашича, "Европада барқарор тинчлик ҳақидаги орзу Россия агрессияси бошланганидан кейин парчаланди". Унинг сўзларига кўра, фақат янги ҳарбий техника сотиб олишнинг ўзи етарли эмас; фавқулодда вазиятларда ҳарбийлар ундан самарали фойдаланиши учун амалий тайёргарлик ҳам кучли бўлиши лозим.
Энди ҳукумат парламентдаги Австрия Озодлик партияси (ФПÖ) ва "Яшиллар" партиясининг қўллаб-қувватловини олишга ҳаракат қилади, чунки мазкур ўзгаришларни қабул қилиш учун парламент аъзоларининг камида учдан икки қисми овози талаб этилади.
Агар қонун маъқулланса, янги тартиб 2027-йил 1-январдан кучга кириши режалаштирилган. Ҳозирча тўққиз ойлик муқобил фуқаролик хизмати муддати ўзгармайди. Бироқ, 2027-йилдан уни икки ойга ихтиёрий равишда узайтириш имконияти яратилади. 2028-йилдан эса чақирилувчилар сони режадаги даражага етмаса, ушбу узайтириш мажбурий тус олади.
Австрия ҳарбий бетараф давлат ҳисобланади ва НАТО аъзоси эмас.