АҚШ уйғурларни мажбурий меҳнатга жалб қилгани учун 43 та Хитой компаниясини “қора рўйхат”га киритди
АҚШ ҳукумати уйғурларнинг мажбурий меҳнатидан фойдаланганликда гумон қилинаётган 43 та Хитой компаниясини “қора рўйхат”га киритди. Бу чекловлар 31-июлдан кучга кирди.
АҚШ Давлат департаменти ва Ички хавфсизлик вазирлигининг қўшма баёнотига кўра, рўйхатга киритилган компаниялар тоғ-кон саноати, қишлоқ хўжалиги, металлургия, фармацевтика, пахта ва озиқ-овқат маҳсулотлари ишлаб чиқариш, денгиз маҳсулотларини қайта ишлаш, литий саноати ҳамда транспорт соҳаларида фаолият юритади. Улар орасида Хитойнинг йирик конденсатор ишлаб чиқарувчиларидан бири — Ҳунан Аиҳуа Гроуп ҳам бор.
АҚШ расмийлари ушбу компаниялар товарларни қазиб олиш, етиштириш, қайта ишлаш ёки ишлаб чиқариш жараёнида мажбурий меҳнатдан фойдаланган бўлиши мумкин деб ҳисобламоқда.
Янги компаниялар қўшилганидан кейин Уйғурлар мажбурий меҳнатининг олдини олиш тўғрисидаги қонун (УФЛПА) доирасидаги рўйхатдаги ташкилотлар сони 144 тадан 187 тага етди. Бу Доналд Трамп маъмурияти даврида мазкур рўйхатнинг илк бор кенгайтирилиши, шунингдек, қонун кучга кирганидан буён бир мартада киритилган компаниялар сони бўйича энг йирик янгиланиш бўлди.
АҚШ Давлат департаменти расмий вакили Томми Пиготтнинг билдиришича, мазкур механизм мажбурий меҳнатдан фойдаланиб ишлаб чиқарилган товарларнинг АҚШ бозорига кириб келишини чеклашга қаратилган.
УФЛПА қонуни 2021-йил декабрда қабул қилинган бўлиб, унга кўра, Шинжон-Уйғур автоном раёнида тўлиқ ёки қисман ишлаб чиқарилган маҳсулотлар мажбурий меҳнат билан боғлиқ деб ҳисобланади. Бундай товарларни АҚШга олиб кирмоқчи бўлган импортчилар маҳсулот ишлаб чиқаришда мажбурий меҳнатдан фойдаланилмаганини тасдиқлаши керак. Қонун нормаларини АҚШ божхона органлари 2022-йил июндан амалда қўллай бошлаган.
Вашингтон Хитой ҳукуматини Шинжонда уйғурлар ва бошқа этник ҳамда диний озчилик вакилларининг ҳуқуқларини бузиш, уларни лагерларда сақлаш ва мажбурий меҳнатга жалб қилишда айблаб келади. Пекин эса бу айбловларни рад этиб, минтақадаги сиёсат терроризм, экстремизм ва сепаратизмга қарши курашиш, аҳолини касбга ўргатиш ҳамда иқтисодий ривожланишни таъминлашга қаратилганини таъкидлайди.