Абдуқодир Ҳусановнинг “Манчестер Сити”даги маоши маълум бўлди

Абдуқодир Ҳусановнинг "Манчестер Сити"даги маоши ошкор этилди

Ўзбекистонлик ҳимоячи Абдуқодир Ҳусановнинг Англиянинг "Манчестер Сити" клуби билан имзолаган янги шартномасининг молиявий шартлари маълум бўлди. 22 ёшли футболчи жорий йилнинг июл ойида "Манчестер Сити" билан 2031-йил 30-июнига қадар амал қиладиган беш йиллик шартнома тузган эди.

Сапологй порталининг хабар беришича, Ҳусановнинг кафолатланган йиллик маоши 5,2 миллион фунт стерлингни ташкил этади, бу ҳафтасига 100 минг фунтга тенг. Беш йиллик шартноманинг умумий кафолатланган қиймати 26 миллион фунтни ташкил қилади.

Шартномада натижаларга боғлиқ қўшимча бонуслар ҳам кўзда тутилган. Ушбу бонуслар орқали футболчи ҳафтасига яна 25 минг фунт (йиллик 1,3 миллион фунт) ишлаб топиши мумкин. Барча бонуслар ҳисобга олинганда, ҳимоячининг максимал йиллик маоши 6,5 миллион фунтга етади.

Маълумот учун, жамоанинг энг кўп маош олувчи футболчиси Эрлинг Ҳоланд бўлиб, унинг ҳафталик асосий даромади 525 минг фунтни ташкил этади. Ундан кейинги ўринларда Жек Грилиш (300 минг фунт), Омар Мармуш (295 минг фунт), Фил Фоден (280 минг фунт) ва Жанлуижи Доннарумма (265 минг фунт) жойлашган.