12 млн долларлик тўй: Роналду ва Жоржина дабдабали тўйга тайёргарлик кўрмоқда
12 миллион долларлик тўй: Роналду ва Жоржина дабдабали маросимга ҳозирлик кўрмоқда
ОАВ хабарларига кўра, Криштиану Роналду ва Жоржина Родригеснинг никоҳ тўйи жорий йилнинг август ойида бўлиб ўтиши кутилмоқда.
Португалия нашрларининг ёзишича, тўй маросими футболчининг туғилган жойи – Мадейра оролида ўтказилади. Никоҳ Фуншал соборида бўлиб ўтиши, байрам зиёфати эса оролнинг энг ҳашаматли меҳмонхоналаридан бирида ташкил этилиши режалаштирилган. Қизиғи шундаки, Роналдунинг жаҳон миқёсидаги шуҳратга эришиш йўли айнан шу ердан бошланган эди, энди эса у ҳаётида яна бир муҳим қадамни ташлашга тайёргарлик кўрмоқда.
Келин-куёвни табриклаш учун футболчининг дўстлари, жумладан, Килиан Мбаппе, Винисиус Жуниор, Родриго, Карим Бензема, Зинедин Зидан, Неймар, Рио Фердинанд ва бошқалар ташриф буюради.
Криштиану Роналду ва Жоржина Родригес: замонавий эртак қандай бошланган?
Шоу-бизнес оламидан таклиф этилган меҳмонлар рўйхати ҳам катта шов-шувларга сабаб бўлди: байрамда Рианна, Женнифер Лопес, Дрейк, Жастин Бибер, Тревис Скотт, Вин Дизел, блогерлар МрБеаст ва ИШовСпеед, шунингдек, телебошловчи Пирс Морган ҳам иштирок этиши мумкин.
Таклиф этилганлар орасида Ҳабиб Нурмагомедов ва Конор Макгрегорнинг ҳам борлиги ҳақидаги хабар мухлисларнинг алоҳида эътиборини тортди. 2018-йилда россиялик спортчининг ғалабаси билан якунланган жангда тўқнаш келган афсонавий рақиблар бу сафар октагонда эмас, балки байрам дастурхони атрофида учрашишлари мумкин.
Эслатиб ўтамиз, Роналду ва Родригес 2016-йилдан бери бирга бўлиб, беш нафар фарзандни тарбиялайди: кичик Криштиану, суррогат онадан туғилган эгизаклар Ева ва Матео, ҳамда икки қизи — Алана Мартина ва Белла Эсмералда.
Жуфтлик ўтган йилнинг август ойида унаштирилганини эълон қилганди. Ўшанда Жоржина Родригес ҳашаматли никоҳ узугини кўрсатиб, Криштиануга розилик берганини маълум қилганди. Шундан сўнг футболчи қайлиғини бир неча бор қимматбаҳо совғалар — Порсче Тайсан электромобилидан тортиб, эксклюзив соатлар, дизайнерлик сумкалари ва кийимлари билан хурсанд қилди.
Шундан кейин Роналду тўйга тайёрлигини, бироқ бунинг учун қулай фурсатни — жаҳон чемпионатидан кейинги вақтни танламоқчи эканлигини бир неча бор айтган.
Миш-мишларга кўра, футболчи тўй маросимини ташкил этиш учун қарийб 12 миллион доллар сарфлаши мумкин. Агар бу маълумот тасдиқланса, тўй ҳақиқатан ҳам йилнинг энг кўп муҳокама қилинадиган йирик тадбирларидан бири бўлади.