Зидан Месси учун «юз марта овоз беришга» тайёрлигини айтганми?
Зидан 39 ёшли Мессини ҳақиқатан ҳам «Олтин тўп»га энг муносиб ва тарихдаги энг буюк футболчи деб атадими? Интернетда миллионлаб мухлислар муҳокамасига сабаб бўлган иқтибосларнинг манбаси топилмади, уларни дастлаб тарқатган нашр эса бу гапларни кейинчалик ўчирди.
Зидан Месси учун «юз марта овоз беришга» тайёрлигини айтганми?
Испаниянинг Марса газетаси 8-сентабр куни Франсия миллий жамоаси бош мураббийи Зинедин Зиданга тегишли дейилган Лионел Месси ҳақидаги фикрларни ўз ичига олган материални эълон қилди.
Нашр талқинига кўра, Зидан гўё 2026-йилги «Олтин тўп» учун аргентиналикка «юз марта овоз беришга тайёрлигини» билдирган, унинг 39 ёшдаги ўйинларини «ғайриоддий» деб атаган ва Мессининг тарихдаги энг буюк ўйинчи мақомига шубҳа қилиш «футболни тушунмаслик» эканини таъкидлаган.
Марса бу сўзларнинг манбасини кўрсатмаган. Матнда на интервю, на матбуот анжумани, на бирор аудиоёзув бор эди. Шу куниёқ Марсаъга таянган ҳолда Гоал, Яҳоо, Гулф Невс ва бошқа кўплаб нуфузли нашрлар бу иқтибосларни қайта чоп этиб, тарқатди.
Орадан бир кун ўтгач, Марса сайтида ушбу баҳсли иқтибослар йўқолди. Таҳририят бу борада на раддия берди, на уларни олиб ташлаш сабабини тушунтирди. Зиданнинг ўзи ҳам, Франсия футбол федерацияси (ФФФ) ҳам вазият юзасидан сукут сақлади.
Ушбу материални тарқатган Швейсариянинг Вацон портали Марса текширилмаган маълумотни чоп этган бўлиши мумкинлигини тахмин қилди. Иқтибоснинг асл манбаси пародия аккаунт, автоматик яратилган матн ёки баён қилишдаги хато бўлиши эҳтимоли ҳам айтилди.
Бундай шов-шувга сабаб нафақат иқтибоснинг мазмуни, балки у нисбат берилган шахс ҳамдир. Зидан — «Реал»нинг собиқ ўйинчиси ва мураббийи, Криштиану Роналду билан бирга Чемпионлар лигасининг уч карра ғолиби. «Барселона» ва Месси эса қарийб йигирма йил давомида «Реал»нинг асосий рақиби бўлиб келган. Зидан Мадрид клубини бошқарган пайтда «Роналду ёки Месси?» деган саволга бошқача жавоб берган: энг зўри — «Реал»да ўйнайдиган футболчи.
Шу сабабли, Месси учун юз марта овоз бериш ва ГОАТ (тарихдаги энг буюк ўйинчи) ҳақидаги баҳсга нуқта қўйиш ҳақидаги гаплар шахсий фикр сифатида эмас, балки «қароргоҳни ўзгартириш» сифатида қабул қилинди. Айнан шу зиддият матннинг тез тарқалиши ва шов-шувга сабаб бўлди.