Зеленский: Урушни тўхтатишнинг ягона йўли - музокаралар
Украина президенти Володимир Зеленский сентабр охирига қадар АҚШ делегацияси билан яна бир бор учрашишни режалаштираётганини маълум қилди. Учрашувда энергетика ва озиқ-овқат хавфсизлиги, шунингдек, Украина қишлоқ хўжалиги маҳсулотлари экспорти билан боғлиқ масалалар муҳокама қилиниши кутилмоқда.
Зеленский: Урушни тўхтатишнинг ягона йўли — музокаралар
Володимир Зеленский бу ҳақда 11-сентабр куни Канада бош вазири Марк Карни билан бўлган музокаралардан кейин журналистларга маълум қилди.
Украина президентининг айтишича, АҚШ делегацияси билан навбатдаги учрашув Ню-Ёркда БМТ Бош ассамблеяси доирасида бўлиб ўтиши мумкин.
Зеленский музокараларда дон ва бошқа қишлоқ хўжалиги маҳсулотлари экспорти масаласига алоҳида эътибор қаратилишини билдирди. Унинг таъкидлашича, Россия Қора денгиз орқали Украина қишлоқ хўжалиги маҳсулотлари экспортига тўсқинлик қила бошлаган.
Шу билан бирга, Украина раҳбари Киевнинг Европа, Канада ёки АҚШ билан музокаралари фонида Россия Украинага ҳужумларни кучайтириши мумкинлигини айтди.
«Россияни билган ҳолда айтишим мумкинки, улар бизнинг европаликлар, канадаликлар ёки америкаликлар билан қаердадир музокара олиб бораётганимизни эшица, бизга қарши ҳужумларни кучайтиришга ҳаракат қилади. Бу музокаралар ёки ҳар қандай мулоқотни бузиш учун қилинади. Аммо биз бу йўналишда ҳаракат қилишда давом этамиз. Урушни тўхтатишнинг бошқа йўли йўқ», - деди Зеленский.
Унинг сўзларига кўра, Россия кучларининг Украина инфратузилмасига зарбалари давом этаётган бир пайтда Киев энергетика хавфсизлиги масалалари бўйича АҚШ делегацияси билан ҳар куни алоқада бўлиб турибди.
Зеленский, шунингдек, Россияда 18–20-сентабр кунлари ўтказилиши режалаштирилган Давлат думаси сайловларига қадар Москва билан жиддий музокаралар бошланишини кутмаётганини билдирди.
Аввалроқ Вашингтон ҳам Россиядаги сайлов кампанияси якунлангач, музокара жараёни қайта фаоллашишига умид қилаётгани хабар қилинган эди.
АҚШ президенти Доналд Трамп эса 9-сентабр куни Россия президенти Владимир Путин билан телефон орқали мулоқот қилганидан сўнг, Путин Украинадаги урушни тугатиш бўйича келишувга эришишга тайёр эканини айтган.
«Бизда жуда яхши суҳбат бўлди. У келишувни хоҳлаяпти», - деган Трамп. АҚШ президенти, шунингдек, Володимир Зеленский ҳам келишувга эришишни истаса, бу «жуда яхши» бўлишини таъкидлаган.
Сентабр бошида Вашингтон Киев ва Москва ўртасида музокараларни қайта бошлаш мақсадида воситачилик ҳаракатларини яна фаоллаштирган. АҚШ президентининг махсус вакили Стив Уиткофф ва Трампнинг куёви Жаред Кушнер Москвага навбатдаги ташрифини амалга оширганидан сўнг Кремл Путин Трампни Европага нисбатан ҳеч қандай «тажовузкор режалари» йўқлигига ишонтирганини маълум қилган.