Зеленский Қирғизистон ва Тожикистондаги элчиларини ишдан олди

Зеленский Қирғизистон ва Тожикистондаги элчиларни лавозимидан озод этди

Украина президенти Владимир Зеленский Австрия, Тунис, Ливия, Тожикистон, Қирғизистон, Сингапур ва Брунейдаги элчиларини ишдан бўшатди. Бу ҳақда “Украинская Правда” нашри президент фармонларига таяниб хабар берди.

Фармонларга кўра, Василий Химинец Украинанинг Австриядаги элчиси, Владимир Хоманс эса Тунис ва шу билан бирга Ливиядаги элчиси лавозимидан озод этилган. Шунингдек, Тожикистондаги (Валерий Евдокимов), Қирғизистондаги (Валерий Жовтенко), Сингапур ва Брунейдаги (Екатерина Зеленко) элчилар ҳам ўз вазифасидан четлатилган.

Дипломатик корпусдаги бу ўзгаришлар доирасида ЮНЕСКО бўйича вакиллик ҳам алмашган. Зеленский бир вақтнинг ўзида Франсиядаги элчи бўлиб ишлаётган Вадим Омелченкони Украинанинг ЮНЕСКОдаги доимий вакили лавозимидан озод қилган. Унинг ўрнини эса Украина Ташқи ишлар вазирлигининг Оммавий дипломатия ва стратегик коммуникациялар департаментини бошқарган Виктория Лялина-Бойко эгаллаган.

Эълон қилинган фармонларда дипломатик ходимларнинг ишдан олиниш сабаблари аниқлаштирилмаган.

Аввалроқ Қозоғистон президенти Қосим-Жўмарт Тўқаев бир қатор элчиларни ишдан олганди. Жумладан, 10-июл куни тўртта давлатдаги (Қирғизистон, Қатар, Сербия ва Венгриядаги) элчи ўзгарган. Венгрияга инглиз, чех ва франсуз тилларини биладиган аёл элчи тайинланган. 22-июл куни эса Тўқаевнинг фармони билан Ерали Тугжанов Қозоғистоннинг Ўзбекистондаги фавқулодда ва мухтор элчиси этиб тайинланди. Президентнинг яна бир фармони билан Қозоғистоннинг Ўзбекистондаги элчиси Бейбут Атамқулов лавозимидан озод этилди.