Зарбдорда боғча мудираси ўлдирилиши ортидан туман ҳокими ишдан олинди — манба
Бекзод Тошпўлатов 31-октябр куни лавозимидан озод этилган. Туман ҳокими вазифасини вақтинча бажариш унинг ўринбосари Алишер Эржигитов зиммасига юклатилган.
Зарбдорда боғча мудираси ўлдирилгач, туман ҳокими лавозимидан олинди — манба
Жиззах вилоятининг Зарбдор тумани ҳокими Бекзод Тошпўлатов боғча мудираси ўлдирилиши ортидан лавозимидан озод этилди.
Манбаларга кўра, Тошпўлатов 31-октябр куни вазифасидан бўшатилган. Бу қарор тумандаги боғчалардан бири мудирасининг ўлдирилиши ортидан қабул қилинган. Ҳодиса ҳақида тарқалган маълумотларда собиқ ҳокимнинг номи ҳам тилга олинган, аммо унинг воқеага алоқадорлиги юзасидан расмий хулоса эълон қилинмаган.
Туман ҳокимлиги матбуот котиби Ўктам Сулаймонов ҳокимнинг ишдан олинганини тасдиқлади.
Туман ҳокими вазифасини вақтинча бажариш ҳокимнинг қурилиш, тўсиқларсиз муҳит яратиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосари Алишер Эржигитов зиммасига юклатилди.
Бекзод Тошпўлатов 2025-йил 17-январдан бери Зарбдор туманини бошқариб келаётган эди. Унгача у Жиззах вилояти солиқ бошқармаси бошлиғи лавозимида ишлаган.
Тошпўлатов 1983-йилда Жиззах шаҳрида туғилган. Аввал вилоят солиқ бошқармаси бошлиғининг биринчи ўринбосари бўлган, 2020-йил декабрда эса бошқарма раҳбари этиб тайинланган.
Боғча мудирасининг ўлдирилиши
Kun.uzънинг хабар беришича, Зарбдор туманининг Янгиҳаёт маҳалласида боғча мудираси бўлиб ишлаган аёл қотиллик қурбони бўлган. Марҳуманинг икки нафар фарзанди бор.
Бош прокуратура матбуот котиби Ҳаёт Шамсутдинов нашрга аёлнинг турмуш ўртоғи гумонланувчи сифатида ушланганини маълум қилган. У ҳодисадан кейин 102 рақамига ўзи қўнғироқ қилиб, воқеа ҳақида хабар берган.
Ҳолат юзасидан 2026-йил 29-октябрда Зарбдор туман прокуратураси томонидан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилган.