Юнусобод аҳолиси Энергетика вазирлигининг ваъдаларини чидамлиликка текшириб кўриб, қўпол иборалар хазинасини тугатишди
Ўзбекистон Energetika вазирлиги куз-қиш мавсуми электр энергияси узилишларсиз ўтишига ишонтирди. Тўғри, бир шарт билан: режали таъмирлаш ишлари талаб этилса, вақтинчалик ўчиришлар барибир юз бериши мумкин. Ведомствонинг тушунтиришича, охиргиси эскирган ускуналарни янгилаш ва электр тармоқлари инфраструктурасини модернизация қилиш учун зарур. Бу умидбахш эшитилади. Аммо Юнусободнинг иккита (олинчи ва еттинчи) мавзеси аҳолиси, электр таъминотидаги вазиятга қараганда, аллақачон […]
Юнусобод аҳолиси Энергетика вазирлигининг ваъдаларини синовдан ўтказиб, аччиқ сўзлар захирасини тугатиб бўлганга ўхшайди
Ўзбекистон Энергетика вазирлиги куз-қиш мавсуми электр таъминотида узилишларсиз ўтишини маълум қилди. Бироқ бир шарт билан: режали таъмирлаш ишлари зарур бўлган тақдирда, қисқа муддатли ўчиришлар барибир юз бериши мумкин. Идоранинг тушунтиришича, булар эскирган ускуналарни янгилаш ва электр тармоқлари инфратузилмасини модернизация қилиш учун зарур.
Бу умидбахш туюлади. Аммо Юнусободнинг иккита — олтинчи ва еттинчи даҳалари аҳолиси электр таъминотидаги вазиятга қараб, йиғлашини ёки кулишини билмай қолганга ўхшайди. Бу ерда, шекилли, режали таъмирлашлар ва авариявий ўчиришлар аллақачон кундалик ҳаётнинг бир қисмига айланиб бўлган.
Маҳаллий аҳолининг сўзларига кўра, бу ерда чироқ ўчмайдиган ҳафта деярли бўлмайди. Сабаби — «Бешқўрғон» ва «Яблочный» подстанцияларида тез-тез юз бераётган авариялардир. Баъзан электр энергияси суткасига икки-уч марталаб ўчирилади. Ҳатто байрам кунлари ҳам бундан мустасно эмас: аҳоли 1 сентябрда ҳам, 1 октябрда ҳам чироқсиз қолган эди.
Туман электр тармоқларининг (ТЭТ) маҳаллий гуруҳларда эълон қилинадиган хушмуомалалик билан сўралган узрлари ҳеч нарсани ўзгартирмаяпти. Бундан одамларнинг хонадони ёришиб қолмайди ва кўнгли таскин топмайди: маиший техникадан ажралиб қолиш хавфи бор, одатий ҳаёт тарзи бузилади, навбатдаги ўчириш ҳақидаги хабар эса фақат ғазабни оширади, холос.
Ваҳоланки, ҳали 2023 йилдаёқ аҳолига озгина сабр қилиш кераклиги ва электр таъминотидаги муаммолар ўтмишда қолиши ваъда қилинган эди.
Айнан ўшанда Тошкентнинг ушбу туманида ҳаводаги юқори кучланишли электр узатиш тармоқларини ер ости кабель тармоқларига алмаштириш бўйича кенг кўламли ишлар бошланган эди. Ишлар аномал совуқ қишдан сўнг пойтахт энергетика тизимини модернизация қилиш бўйича шошилинч дастур доирасида олиб борилганди.
Электр тармоқларини ер остига ўтказиш инфратузилмани кучли шамол ва ёғингарчиликлардан ҳимоя қилиши, аварияларни камайтириши ва зўриқиш билан ишлаётган подстанцияларга тушаётган юкни енгиллаштириши керак эди.
Бироқ, давом этаётган ўчиришлардан кўриниб турибдики, аҳоли кутилган натижани сезмади. Уларнинг сўзларига кўра, авариялар тобора тез-тез содир бўлмоқда, электрдаги узилишлар эса аста-секин чорасизлик сифатида қабул қилинмоқда.
Ўтказилган модернизациядан сўнг нега вазият яхшиланмагани тушунарсиз бўлиб қолмоқда.
Энергетика вазирлиги маълумотларига кўра, фуқароларнинг бевосита электр таъминотидаги узилишлар бўйича мурожаатлари сони 49,7 фоизга — 14 мингтагача камайган.
Идоравий статистика учун бу, шубҳасиз, ижобий кўрсаткич. Аммо Юнусободнинг икки даҳаси аҳолисига бундан ҳеч қандай енгиллик йўқ. Агар электр энергияси илгаригидек мунтазам равишда ўчиб турса, шикоятларнинг умумий сони камайганининг ўзи муаммони ҳал қилмайди.
Одамларни энергетикларнинг ҳисоботлари ва хушмуомалалик билан сўраган узрлари ташвишга солмайди. Уларга чироқ керак — кутилмаган ўчиришларсиз, бузилган маиший техникаларсиз ва ҳар сафар электр узатиш қачон тикланишини суриштириш заруратисиз.
Олдинда турган қишдан беталафот ўтиш ҳақидаги ваъдалар фонида саволлар аввалгидек очиқ қолмоқда: нега авариялар бир хил ҳудудларда такрорланаверади, ўтказилган модернизация нима берди ва аҳоли қачон барқарор электр таъминотига умид қила олади?
Ҳозирча эса бош энергетика идораси шуни ёдда тутиши керак: тизимнинг ишончлилиги ҳақидаги ишончли баёнотлар фақат розеткаларда ўз тасдиғини топгандагина ишонарли янграйди.