Йўлбарс йигитни ғажиб ташлади, Трамп эса у билан ўйнаётгани акс этган роликни жойлади
Британияда йўлбарс ҳужуми оқибатида 23 ёшли Уилям Чапман ҳалок бўлди. Бир неча кундан сўнг АҚШ президенти Доналд Трамп ҳужум акс этган видеони улашди, марҳумнинг яқинлари эса бундай тасвирларни тарқатишни тўхтатишга чақирди.
Йўлбарс эркакни ғажиб ташлади, Трамп эса у билан ўйнаётгани тасвирланган роликни жойлади
Британиянинг Донкастер шаҳридаги ёввойи табиат боғида Олтой номли Амур йўлбарси вольерга кириб қолган эркакка ҳужум қилиб, уни ғажиб ташлади. Бу воқеа 10-октабр куни содир бўлган эди.
Орадан уч кун ўтиб, 13-октабр куни АҚШ президенти Доналд Трамп Трутҳ Сосиал ижтимоий тармоғида йўлбарс ҳужуми акс этган кадрларни улашди ва постига «Табиат билан асло ўйнашманг!» деган изоҳ ёзди.
Кейин у сунъий интеллект ёрдамида тайёрланган яна бир роликни ҳам жойлаштирди. Унда Трампнинг ўзи майсазорда йўлбарс билан думалаб ўйнаётгани, сўнг уни қучоқлаб олгани кўрсатилган.
Марҳумнинг қариндошлари бунга кескин муносабат билдирди. Улар ижтимоий тармоқларда «ўта ҳақоратомуз контент» тарқатилиши уларга оғир ботаётганини айтди. Оила аъзолари бундай материалларни ёйишни тўхтатишни сўради. Шунингдек, полиция ҳам ҳужум тасвирланган видеони тарқатмасликка чақирди.
Ҳалок бўлган британиялик Уилям Чапман 23 ёшда эди. Яқинларининг айтишича, у самимий, меҳрибон ва очиқкўнгил йигит бўлган. У кўп йиллардан бери оғир руҳий хасталикдан даволаниб келган ва кучли таъсир қилувчи дори-дармонларни қабул қилиб юрган.
Маъмурият одамга ҳужум қилган йўлбарс ўлдирилмаслигини билдирди.