Ёзги трансферлар ойнасидан кейин “Нефтчи” Ўзбекистоннинг энг қиммат клубига айланди

Ёзги трансферлар ойнаси якунига етгач, Фарғонанинг “Нефтчи” жамоаси Ўзбекистоннинг энг қиммат футбол клуби мақомини қўлга киритди. Трансфермаркт порталининг сўнгги маълумотларига кўра, айни дамда Ўзбекистон Суперлигасида иштирок этаётган 16 та жамоанинг умумий бозор қиймати 95,34 миллион еврони ташкил этмоқда.

“Нефтчи” клубининг таркиби умумий қиймати 12,85 миллион еврога етиб, бу кўрсаткич бўйича узоқ вақт давомида пешқадамлик қилиб келган Тошкентнинг “Пахтакор” (12,28 миллион евро) жамоасини ортда қолдирди. Наманганнинг “Навбаҳор” клуби 9,63 миллион евро билан учинчи ўринни эгаллаган. Кучли бешликни Қаршининг “Насаф” (8,45 миллион евро) ва Самарқанднинг “Динамо” (6,78 миллион евро) жамоалари якунлаган.

“Нефтчи”нинг клублар рейтингида биринчи ўринга кўтарилишига асосан битта муҳим трансфер – Коффи Куаонинг жамоага келиши сабаб бўлди. Кот-дъивуарлик ўнг қанот ҳимоячисининг нархи 2,5 миллион еврога баҳоланган бўлиб, у ҳозирда Ўзбекистон Суперлигасининг энг қиммат футболчиси ҳисобланади.

Суперлиганинг энг қиммат 10 нафар футболчиси қуйидагилар:

1. Коффи Куао (“Нефтчи”) — 2,50 млн евро

2. Абдувоҳид Неъматов (“Пахтакор”) — 1,50 млн евро

3. Акмал Мозговой (“Пахтакор”) — 1,40 млн евро

4. Ҳожиакбар Алижонов (“Пахтакор”) — 1,30 млн евро

5. Шерзод Насруллаев (“Пахтакор”) — 1,20 млн евро

6. Люпчо Дориев (“Сўғдиёна”) — 1,20 млн евро

7. Ҳожимат Эркинов (“Пахтакор”) — 1,00 млн евро

8. Жамшид Искандеров (“Нефтчи”) — 1,00 млн евро

9. Достонбек Ҳамдамов (“Пахтакор”) — 900 минг евро

10. Башар Ресан (“Пахтакор”) — 800 минг евро

Маълумот учун, Ўзбекистон Суперлигасининг амалдаги чемпиони Фарғонанинг “Нефтчи” клуби ҳисобланади.