Европарламентда хавф остидаги россияликларга шошилинч виза бериш таклиф қилинди
Ўлдирилган журналист Анна Политковскаянинг набираси Анна Виктория Политковская Европа Иттифоқини Россияда таъқиб ва зўравонлик хавфи остида қолган шахслар учун шошилинч гуманитар визалар механизмини яратишга чақирди. Таклиф журналистлар, фаоллар, талабалар ва ҳимояга муҳтож бошқа одамларни қамраб олади.
Европарламентда хавф остидаги россияликларга тезкор виза бериш таклифи илгари сурилди
ДВ хабарига кўра, Анна Виктория Политковская 5-октабр куни Страсбургда бувиси хотирасига бағишланган тадбирда европарламент депутатларига мурожаат қилган. Ушбу учрашув Анна Политковская ўлдирилганининг 20 йиллиги муносабати билан ташкил этилган.
Унинг айтишича, Россияда хавфсиз қолиш имконияти бўлмаган одам ёрдам сўраб мурожаат қилиши, қисқа муддатда жавоб олиши ва хавфсиз жойга чиқиб кетиши учун амалий йўл бўлиши керак.
«Бундай инсон ўзининг ҳимояга муҳтожлигини ҳаёти эвазига исботлашга мажбур бўлмаслиги керак», - деган Политковская.
У мурожаати давомида Шимолий Кавказда улғайган яқин дўсти Сашанинг тақдирини мисол қилиб келтирган. Политковскаянинг сўзларига кўра, Саша оиласи ва атрофидагиларнинг салбий муносабатига дуч келган, 16 ёшида эса жинсий зўравонликни бошдан кечирган.
Саша Россияда ўзи учун хавфсиз келажак кўрмаган ва мамлакатдан кетишни истаган. Бироқ хорижда ўқиш учун ҳужжатлар, маблағ ва университетга кириш имконияти керак бўлган. Ҳимоя сўраш учун эса, аввало, бундай ёрдам олиш мумкин бўлган мамлакатга етиб бориши лозим эди.
Политковскаянинг сўзларига кўра, бувиси бир вақтлар Сашанинг отаси ҳаётини сақлаб қолган. Кейинчалик унинг ўғли ёрдамга муҳтож бўлганида, зарур кўмакни ола олмаган. Саша ўз жонига қасд қилган.
«Сизнинг ёрдамингиз билан кейинги Саша тирик қолиши мумкин», - дея мурожаат қилган у депутатларга.
Тадбирда БМТнинг Россиядаги инсон ҳуқуқлари бўйича махсус маърузачиси Мариана Кацарова ҳам сўзга чиққан. Унинг баҳосича, Анна Политковская Чеченистон ҳақидаги материалларида ёритган репрессиялар эндиликда бутун Россияга тарқалган.
Кацарова сиёсий сабабларга кўра таъқиб қилиш оммавий тус олганини, қийноқлар кенг ва тизимли қўлланаётганини айтган. Унинг таъкидлашича, хориждаги ҳукумат танқидчилари ҳам жиноят ишлари, сиртдан чиқарилган ҳукмлар, молиявий чекловлар ва Россия ҳокимияти манфаатларида ҳаракат қилувчи шахслар орқали босимга учрамоқда.
«Новая газета Европа» бош муҳаррири Кирилл Мартинов эса Европани Украинага ёрдамни оширишга чақирган. У Чеченистондаги уруш билан Россиянинг Украинага босқини ўртасида бевосита боғлиқлик борлигини таъкидлаган.