Европада 2026-йил бошидан бери қарийб 650 минг гектар ҳудуд ёниб кетди

Европада 2026-йил бошидан бери қарийб 650 минг гектар майдон ёниб кетди

2026-йил бошидан буён Европада ўрмон ёнғинлари сабаб қарийб 648 минг гектар ҳудуд зарар кўрди.

Бу рақам ўтган йилнинг шу давридагидан паст. 2025-йилда айни вақтга келиб Европада қарийб 995 минг гектар ҳудуд ёнғинлардан зарар кўрган эди. Шунга қарамай, Жанубий Европанинг бир қатор давлатларида ёнғинлар майдони сўнгги 20 йиллик ўртача кўрсаткичдан анча юқори бўлган.

Энг катта зарар Испанияда қайд этилди — мамлакатда ёнғинлар 295 минг гектардан ортиқ ҳудудни қамраб олди.

Франсияда қарийб 96,5 минг гектар майдон ёниб кетган. Бу мамлакатда сўнгги йилларнинг ўртача кўрсаткичи 14,8 минг гектарни ташкил этади. Италияда эса ёнғинлар қарийб 105 минг гектар ҳудудни қамраб олган, ҳолбуки кўп йиллик ўртача кўрсаткич қарийб 57 минг гектар.

Айни пайтда Португалия ва Грецияда ёнғинлар оқибатида зарар кўрган ҳудуд майдони кўп йиллик ўртача кўрсаткичдан паст бўлган.

Тадқиқотчилар оғир ёнғин мавсумини эрта бошланган жазирама ва кучли қурғоқчилик билан изоҳламоқда. Бунга қишда ёғингарчиликнинг кўплиги ҳам таъсир қилган. Нам қиш ўт-ўлан ва бошқа ўсимликларнинг тез ўсишига олиб келган, ёзда эса улар қуриб, ёнғин учун осон алангаланадиган “ёқилғи”га айланган.

Мутахассисларнинг таъкидлашича, ёнғинларнинг аксариятига бевосита инсон омили сабаб бўлмоқда. Бунга эҳтиёцизлик ёки қасддан ўт қўйиш ҳолатлари киради.

2026-йилда Франсия ва Испанияда аномал иссиқ, қуруқ ҳаво ва кучли шамол сабаб йирик ўрмон ёнғинлари авж олди. Икки мамлакатда хавфли ҳудудлардан 300 мингдан ортиқ аҳоли эвакуация қилинди.

Бундан ташқари, Франсияда 1 900-йилдан бери энг иссиқ ёз кузатилди. Мамлакатда июн охирида кузатилган иссиқ тўлқини ўзининг юқори даражадаги интенсивлиги билан рекорд ўрнатган. Ушбу даврда иссиқлик билан боғлиқ 2 025 та қўшимча ўлим ҳолати қайд этилган. Ўлимлар, айниқса, 45 ёшдан катта аҳоли орасида кўпайган.