Ер остига 8,3 километр: Хитойда янги ўта чуқур қудуқ бурғиланди
Хитойда Такламакон чўлининг шимолий чеккасида чуқурлиги 8 345 метрга етган қудуқни бурғилаш якунланди. У Тарим ҳавзасининг чуқур қатламларида нефт ва газ захираларини излаш учун мўлжалланган.
Ер остига 8,3 километр: Хитойда янги ўта чуқур қудуқ қазилди
Чжантан-1 қудуғи мамлакат шимоли-ғарбидаги Шинжон-Уйғур автоном раёнининг Венсу уездида жойлашган. Бурғилаш ишлари 2-октабр куни ниҳоясига етказилган.
Бу Хитойда тўлиқ маҳаллий ишланмалар асосида яратилган ва 12 минг метргача чуқурликда ишлашга мўлжалланган бурғилаш қурилмаси ёрдамида қазилган иккинчи ўта чуқур қудуқдир.
Қудуқ орқали Тарим ҳавзасининг чуқур қатламларида нефт ва газ тўпланиши мумкин бўлган йирик геологик тузилмалар ўрганилади. Тадқиқотларнинг мақсади — углеводород захираларини ошириш учун истиқболли янги ҳудудларни аниқлаш.
Фойдаланилган бурғилаш қурилмасининг пўлат минораси 82 метр баландликка эга. У 6 минг от кучига тенг бурғилаш лебёдкаси — юк кўтариш механизми билан жиҳозланган. Қурилманинг кўтариш тизими 900 тоннагача юкни кўтаришга қодир.
Интеллектуал бошқарув тизими эса бурғилашнинг барча босқичларидаги операцияларни автоматлаштиришга хизмат қилади.
Мазкур ускунанинг яратилиши Хитойга 10 минг метрдан ҳам чуқур қудуқларни бурғилашда маҳаллий технологиялардан фойдаланиш имконини берган. Янги қудуқнинг амалдаги чуқурлиги 8 345 метр бўлса, қурилманинг лойиҳавий имконияти 12 минг метргача етади.
Ҳозирга қадар Тарим нефт конида чуқурлиги 8 минг метрдан ошадиган 270 дан зиёд қудуқ бурғиланган. Бу Хитойдаги шундай қудуқларнинг ярмидан кўпини ташкил этади.
2025-йилда мазкур ҳудудда Шендике-1 қудуғини бурғилаш ҳам якунланган эди. Унинг чуқурлиги 10 910 метрга етган.