Ярадор ҳолатида кабина эшигини очган ва одамларни қутқарган. Қаҳрамонга айланган учувчи ҳақида нималар маълум?
Флйдубаи авиакомпаниясининг Дубайдан Тел-Авивга учган самолёти ҳалокатга учрашининг олдини олгани учун қаҳрамон деб аталаётган ҳиндистонлик учувчи Смит Маччҳар учун авиацияда ишлаш болаликдаги орзу бўлмаган.
Ярадор бўлса ҳам кабина эшигини очиб, одамларни қутқарган. Қаҳрамонга айланган учувчи ҳақида нималар маълум?
Маччҳар оилавий тўқимачилик бизнеси билан шуғулланишни режалаштирган эди, 19 ёшида эса авиацияга қизиқиб қолади ва бу унинг онасини жуда хавотирга солади, дея ҳикоя қилади Реутерс агентлигининг Ҳиндистондаги бюроси. 30-сентабр кунги парвоз чоғида унинг ўғлига ҳаводаги самолёт кабинасида иккинчи учувчи пичоқ билан ҳужум қилиб, жароҳат етказди.
Исроил расмийларига кўра, кабина полида қонга беланиб ётган Смит Маччҳар эшикни очиш тугмасини босишга улгурган ва шундан сўнг кабинага йўловчилардан бири ҳамда экипаж аъзолари кира олган. Кема командирига ҳужум қилган иккинчи учувчи зарарсизлантирилгач, бортда бўлган ва қайтишда учувчиларни алмаштириши керак бўлган иккинчи экипаж самолёт бошқарувини қўлга олиб, Саудия Арабистонининг Тобук шаҳридаги аеропортга фавқулодда қўнишни амалга оширган.
«У [Маччҳар] ўз ҳаётини хатарга қўйиб, мардона олишди ва 11-сентабр воқеаларига ўхшаш терактнинг олдини олди», – деди пайшанба куни Ҳиндистон бош вазири Нарендра Моди.
Аввалроқ у Х ижтимоий тармоғида шундай ёзганди: «Капитан Смит Маччхар – ҚАҲРАМОН. Улкан хавф билан тўқнашиб, жиддий жароҳат олганидан кейин ҳам у бошқаларнинг ҳаётини сақлаб қолиш учун ақл бовар қилмас жасорат ва қатъият кўрсатди».
Исроил бош вазири Бинямин Нетаняҳу ҳам Маччҳарга «фавқулодда жасорат» учун миннатдорчилик билдирган.
«Пичоқда етказилган оғир жароҳатларга қарамай, у қаршилик кўрсатди, кабина эшигини очди ва йўловчилар ҳамда экипаж аъзоларига ҳужум қилган учувчини зарарсизлантиришга имкон берди, бу билан ҳаводаги ҳалокатнинг олдини олди. У 174 кишининг, жумладан, Исроил ва бошқа давлатлар фуқароларининг ҳаётини сақлаб қолди», – дея ёзди чоршанба куни Исроил бош вазири Х ижтимоий тармоғида ва ҳиндистонлик учувчининг тезда тўлиқ соғайиб кетишини тилади.
«У ҳақиқий қаҳрамон», – деган Нетаняҳу.