Японияда ота етти ёшли ўғлини Фудзиямага чиқишда қолдириб кетди
48 ёшли япониялик етти ёшли ўғлини машҳур Фудзияма тоғи чўққисига кўтарилиш йўлида ёлғиз қолдириб кетгани учун полициядан қатъий ҳайфсан олди.
Японияда бир ота етти ёшли ўғлини Фудзияма тоғига чиқиш пайтида қолдириб кетди.
Япония матбуотининг хабар беришича, бу воқеа 20-август куни содир бўлган. Ота икки ўғли, етти ва ўн икки ёшли болалар билан Фудзияма чўққисини (баландлиги 3776 метр) анъанавий маршрут бўйича забт этиш учун йўлга чиққан.
Маршрутнинг бошида кичик ўғил чарчаганини айтган. Катта ўғил эса анча олдинга кетиб қолган эди. Натижада, ота кичик ўғлини йўл четидаги ўриндиққа ўтқазиб, унга ичимлик ва егулик берган ҳамда шу ерда кутиб туришни тайинлаган. Ўзи эса юқорига юришда давом этган.
"Фудзиномия" маршрутидаги олтинчи стансия ходимлари 2 километрдан ортиқ баландликда болани топиб олишган. У туман ичида ва ёмғир остида ўтирган эди.
Ходимлар полицияни чақиришган ва еттинчи ҳамда саккизинчи стансиялар оралиғида отани ҳам топишган. Бу у болани қолдирган жойдан пиёда юришда тахминан уч соатлик масофа эди.
Полициячилар отага зудлик билан қайтишни буюришган ва ўғлини ёлғиз қолдиргани учун унга қатъий огоҳлантириш берилган. Натижада бола саккиз соат давомида бир жойда қолиб кетган.
"Тоққа кўтарилишдан воз кечишга тўғри келса ҳам, болани қолдириб кетмаслик керак эди", – дея полициячилардан бирининг сўзларини келтиради Жапан Тодай нашри.
Ота хатога йўл қўйганини тан олиб, полициядан узр сўраган.
Ота ўғиллари билан ҳаракатланган "Фудзиномия" маршрути жамоат транспортида етиб бориш мумкин бўлган бешинчи стансиядан бошланади.
Шу стансиядан чўққига чиқишгача беш соат вақт кетади, ортга тушишга эса яна уч соатга яқин вақт талаб этилади.
Сўнгги вақтларда Фудзиямада бир неча кўнгилсиз ҳодисалар рўй берган.
Июл ойида унинг ёнбағирларидан йиқилиб, сони ва белини жароҳатлаган 99 ёшли аёлни эвакуация қилишга тўғри келган. Ўтган йили эса у ерга мавсумий чеклов амал қилаётган даврда чиққан 27 ёшли талабани икки марта қутқаришга тўғри келган. Иккинчи мартасида у йўқолган мобил телефонини қидириш учун қайта чиқиб кетганди.
Токиодан жануби-ғарбдаги Фудзияма тоғи Япониянинг учта муқаддас тоғларидан бири ҳисобланади ва кўплаб анъанавий япон расмларида тасвирланган.
2013-йилда ушбу тоғ ЮНЕСКОнинг Жаҳон мероси рўйхатига киритилган.
Ҳар йили Фудзияма чўққисига 200 мингга яқин одам чиқади. Мавсумий чекловлардан ташқари, баъзи йўналишларда чўққини забт этиш учун кунлик чекловлар ҳам амал қилади.