Японияда 7,1 магнитудали зилзила юз берди (видео)

**Японияда 7,1 магнитудали зилзила содир бўлди (видео)**

Япония жануби-ғарбий қисмида 7,1 магнитудали зилзила қайд этилди. Кёдо агентлигининг хабар беришича, бир неча киши жароҳат олган.

Япония метеорология агентлиги (ЖМА) маълумотларига кўра, зилзила эпимаркази Кюсю оролидаги Кумамото префектурасида, 10 километр чуқурликда жойлашган. Тҳе Жапан Тимес нашрининг ёзишича, ер ости силкинишлари 28-июл куни маҳаллий вақт билан соат 16:35 да кузатилган.

Қайд этилишича, тахминан 30 дақиқадан сўнг ҳудудда 5 баллгача бўлган такрорий тебраниш (афтершок) содир бўлган. Расмийлар аҳолини янада кучлироқ тебранишлар юз бериши мумкинлигидан огоҳлантирмоқда.

НҲК телеканали эфирида зилзила маркази яқинида бир нечта бинолар қулаб тушгани кўрсатилди. Уки шаҳри ёнғин хизмати телеканалга шаҳарда кўплаб ёнғинлар чиққани ва фавқулодда қўнғироқлар сони кескин ошганини маълум қилди. Об-ҳаво агентлиги Ариаке ва Яцуширо денгизлари қирғоқ ҳудудлари учун сунами хавфидан огоҳлантириш берди. Одамларга соҳил яқинига бормаслик тавсия қилинди.

Шошилинч ўтказилган матбуот анжуманида ҳукуматнинг бош вакили баландлиги тахминан 1 метр бўлган сунами тўлқинлари кутилаётганини айтди. Вазирлар Маҳкамаси бош котиби Минору Киҳаранинг билдиришича, мамлакатдаги атом электр стансияларида, жумладан, Кагосима префектурасидаги Сендай обьектида ҳеч қандай носозликлар аниқланмаган.

Дастлабки сунами тўлқинлари зилзиладан кўп ўтмай етиб келгани айтилмоқда. Кейинги тўлқинлар исталган вақтда кузатилиши мумкин. Бош вазир Санае Такаичи Х тармоғида қолдирган постида зилзила зонасидаги аҳолини худди шундай кучли тебранишлар такрорланиши мумкинлигидан огоҳ бўлишга чақирди. У ҳукумат зарарни имкон қадар тезроқ баҳолаш устида ишлаётганини қўшимча қилди.

Кумамотонинг бошқа шаҳарларида, хусусан, қўшни Нагасаки, Кагосима, Фукуока, Сага ва Миядзаки префектураларида ҳам кучли тебранишлар сезилди. Кюшу Элестрис компанияси маълумотларига кўра, Кумамото префектурасида тахминан 48 минг 300 та хонадон электр энергиясиз қолган. Компания одамлардан узилган электр симларига тегмасликни ва ҳар қандай носозликлар ҳақида хабар беришни сўрамоқда.

Мамлакатда июн ойи охирида ҳам 7,2 магнитудали ер силкиниши қайд этилганди. Оқибатда 11 киши жароҳат олган, 100 га яқин бинога зарар етган. Шунингдек, табиий офат ортидан 114 та мактаб ёпилган.