Япония ноқонуний яшагани учун ўзбекистонликни депортация қилди
Япония иммиграция хизматлари агентлиги Ўзбекистон фуқаросини виза муддати тугаганидан кейин мамлакатда ноқонуний бўлиб тургани учун депортация қилди.
Япония ўзбекистонликни ноқонуний яшагани учун депортация қилди
Япония Иммиграция хизматлари агентлиги мамлакатда ноқонуний бўлиб турган Ўзбекистон фуқаросини республикага депортация қилди. Бу ҳақда Япониянинг Ўзбекистон Республикасидаги элчихонаси хабар бермоқда.
Дипломатик ваколатхона аниқлик киритишича, депортация қилинган шахс Японияга қисқа муддатли виза билан келган, сўнгра виза муддати тугаганидан кейин ҳам мамлакатда қолган ва кейинчалик расмий идоралар томонидан қўлга олинган.
Элчихона талабалик визаси ўқиш учун мўлжаллангани ва ундан пул топиш воситаси сифатида фойдаланиш мумкин эмаслигини эслатиб ўтди. Ноқонуний яшаш ёки ноқонуний меҳнат фаолияти аниқланган тақдирда, қоидабузарларга нисбатан қатъий чоралар — полиция томонидан ушлаб туриш ва ҳибсга олиш, иммиграция марказига жойлаштириш ҳамда депортация қилиш чоралари қўлланилади. Япония ҳукумати қоидабузарлар ҳақидаги маълумотларни Ўзбекистон ҳукуматига тақдим этади, шундан сўнг ватанига қайтганларга нисбатан тегишли чоралар кўрилиши мумкин. Дипломатик ваколатхона фуқароларни ўта эҳтиёткор бўлишга ва «Японияда ишлаш мумкин» деган таклифларга ишонмасликка чақирди.
Бундан ташқари, элчихона Японияда қочқинлик мақомини олиш учун ариза топшириш «мамлакатда узоқ вақт қолиш» ёки «ишлаш» имконини беради, деган кенг тарқалган нотўғри тушунчага эътибор қаратди. Бу мақсадда бундай ариза топшириш мумкин эмас: агар қочқинлик мақомини бериш рад этилса, ариза берувчи иммиграция марказига жойлаштирилиши ёки депортация қилиниши мумкин. Қочқинлик мақоми тўғрисида ариза топширишда ёлғон маълумотлар тақдим этиш ёки фирибгарлик усулларидан фойдаланиш жиддий ҳуқуқий оқибатларга олиб келиши мумкин.