Япония Бухородаги шифохонага тиббий асбоб-ускуналар топширди
Япония элчихонаси инсон хавфсизлигини таъминлаш дастури доирасида Шошилинч тиббий ёрдам марказининг Бухоро филиалига 111,7 минг долларлик асбоб-ускуналар топширди.
Япония Бухородаги шифохонага тиббий асбоб-ускуналар топширди
Бухоро вилоятида тиббий асбоб-ускуналарни топшириш маросими бўлиб ўтди. Уларни Республика шошилинч тиббий ёрдам илмий маркази Бухоро вилояти филиали қабул қилиб олди. Бу ҳақда Япониянинг Ўзбекистондаги элчихонаси хабар бермоқда.
Топшириш маросими Япониянинг «Инсон хавфсизлигини таъминлаш бўйича кичик ҳажмли ижтимоий лойиҳаларга беғараз ёрдам» дастури доирасида бўлиб ўтди. Ускуналарнинг умумий қиймати қарийб 111 720 АҚШ долларини ташкил этди.
Маросим 3 сентябрь куни бўлиб ўтди. Унда Япониянинг Ўзбекистондаги Фавқулодда ва Мухтор Элчиси Хирата Кэндзи ва Ўзбекистон соғлиқни сақлаш вазири ўринбосари Шерзод Муҳамедов иштирок этди.
Бундан ташқари, тадбирда Бухоро вилояти соғлиқни сақлаш бошқармаси бошлиғи Муҳсин Ражабов ва филиал директори Шуҳрат Ҳайдаров ҳозир бўлишди. Маросимда лойиҳага жалб этилган бошқа тиббиёт ходимлари ҳам қатнашди.
Япония билан ҳамкорлик туфайли шифохона гинекологик эндоскопик асбоб-ускуналар тўпламини қабул қилиб олди. Шунингдек, унга артроскопик тўплам ҳам топширилди. Бу янада аниқроқ ташхис қўйиш имконини беради. Бундан ташқари, юқори сифатли жарроҳлик амалиётларини ўтказиш имконияти яратилади.
Элчихона маълумотларига кўра, Япония «Инсон хавфсизлигини таъминлаш» концепциясига катта аҳамият беради. У ҳар бир инсон бахтли ва муносиб ҳаёт кечириши мумкин бўлган жамиятни яратишга қаратилган. Ўзбекистонда ушбу дастур 1995 йилдан буён амал қилиб келмоқда.
Унинг доирасида соғлиқни сақлаш, таълим ва қишлоқ хўжалиги соҳаларида 428 та лойиҳа амалга оширилди. Шундан 114 та лойиҳа соғлиқни сақлаш соҳасига тегишлидир. Бухоро вилояти учун мазкур лойиҳа дастур доирасида ушбу соҳадаги 11-лойиҳа бўлди.
Япония ҳукумати ҳамкорликни давом эттириш ниятида эканини маълум қилди. Бу ҳамкорлик Ўзбекистонда юқори сифатли тиббий хизматлардан фойдаланиш имкониятларини яхшилашга тааллуқлидир.