Янги Тошкент ва «Ширин» массивига хорижий инвестициялар жалб этилади
Давлат раҳбари эълон қилинган имкониятлар қоғозда қолиб кетмаслиги кераклигини таъкидлади. Бунинг учун сармоядорларга ер участкалари,
Янги Тошкент ва «Ширин» массивига хорижий инвестициялар жалб этилади
Янги Тошкент лойиҳаларига хорижий сармоядорлар қизиқишини кучайтириш ва уларни аниқ таклифлар орқали жалб этиш юзасидан топшириқлар берилди. Дастлабки 50 та лот белгиланган бўлиб, уларнинг жойлашуви, лойиҳа имкониятлари, иқтисодий ҳисоб-китоблари ҳамда тақдим этиладиган енгилликларни ўз ичига олган таклифлар пакети элчиларга етказилади.
Хориждаги дипломатик ваколатхоналарга чет эллик сармоядорларни Янги Тошкентдаги инвестиция имкониятлари билан кенгроқ таништириш вазифаси юклатилди. Вазирлар эса хорижий ҳамкорлар ва йирик компаниялар билан ҳар бир учрашувда лойиҳа тақдимотини ўтказиб, уларни қўшма лойиҳаларда қатнашишга таклиф этиши керак.
Давлат раҳбари эълон қилинган имкониятлар фақат қоғозда қолиб кетмаслиги лозимлигини таъкидлади. Бунинг учун сармоядорларга ер участкалари, иқтисодий ҳисоб-китоблар ва амалга ошириш муддатлари кўрсатилган тайёр таклифлар берилиши зарур.
Шунингдек, Президент Самарқанд шаҳридаги «Ширин» массивининг қурилишига Янги Тошкент билан бир кунда старт берилганини эслатди. Бироқ массивдаги ишлар суст кетаётгани танқид қилинди. Тадбиркорларга атиги 19 гектар ер ажратилган, қолган майдонлар эса бўш турибди.
Массивни шаҳар маркази билан боғлайдиган кўприк 1-сентябргача фойдаланишга топширилиши керак эди. Шунингдек, вилоят ҳокимлиги ва бошқармалар биноларини кўчириш ишлари ҳали бошланмаган. Давлат идораларининг ўзи етарлича фаоллик кўрсатмаётгани тадбиркорларнинг сармоя киритиш ҳақидаги қарорларига салбий таъсир қилаётгани қайд этилди.
Шу муносабат билан Янги Тошкент учун белгиланган имтиёз ва имкониятлар «Ширин» массивига ҳам татбиқ этилади. Бу ерда ҳам инвесторларга аниқ лойиҳалар, иқтисодий жиҳатдан асосланган таклифлар ва фаолият юритиш учун қулай шарт-шароитлар тақдим этилиши лозим.