Янги телефонга маълумот кўчиришда пароллар ҳам бегона қўлга тушиши мумкин бўлган
Киберхавфсизлик мутахассислари еттита йирик бренднинг смартфонлар ўртасида маълумот кўчириш иловаларида шахсий ахборотни қўлга киритиш имконини берувчи заифликларни аниқлади. Улар орқали яқин атрофдаги бегона шахс суратлар, хабарлар ва паролларни тутиб олиши мумкин бўлган. Тадқиқотчиларнинг огоҳлантиришидан сўнг ишлаб чиқарувчилар аниқланган камчиликларни бартараф этган.
Янги телефонга маълумот кўчириш чоғида пароллар ҳам бегона қўлга тушиб қолиши мумкин эди
Австриядаги Грац университетининг ахборот хавфсизлиги институти ҳамда Хавфсиз ахборот технологиялари маркази мутахассислари еттита бренд иловасини текширган.
Бундай иловалар эски смартфондаги маълумотларни янги қурилмага симсиз кўчиришга хизмат қилади. Бунинг учун телефонлар орасида тўғридан-тўғри Ви-Фи алоқаси ўрнатилади.
Тажрибаларда айнан шу узатиш жараёнидаги заифликлардан фойдаланиб, маълумотларни тутиб олиш ёки узатишга аралашиш мумкинлиги намойиш этилган. Манбага кўра, бунинг учун симсиз тармоқ таъсир доирасида — тахминан 20–45 метр масофада бўлиш ва қиймати 100 евродан кам ускунадан фойдаланиш кифоя қилган.
Мутахассислар синовларда СМС-хабарлар, контактлар, суратлар, саломатликка оид маълумотлар, иловаларда сақланган пароллар ва Ви-Фи тармоқлари калитларига киришга муваффақ бўлган. Айрим ҳолатларда кўчирилаётган илова ўрнатиш файлларини алмаштириш ва янги смартфонга зарарли дастур киритиш имконияти ҳам аниқланган.
Хавф телефондан одатий фойдаланишнинг барча ҳолатларига эмас, балки заиф иловалар орқали маълумот кўчириш жараёнига тааллуқли. Манбада харидорларга янги телефонни созлаш ва маълумотларни ўтказиш хизмати кўрсатиладиган электроника дўконлари ҳамда алоқа салонларида бу масала айниқса муҳим экани қайд этилган.
Тадқиқотчилар натижаларни эълон қилишдан олдин компанияларни хабардор қилиб, ҳимоя янгиланмаларини тайёрлаш учун уларга вақт берган. Шундан сўнг аниқланган заифликлар бартараф этилган.
Мутахассислар маълумот кўчиришдан олдин ҳар икки смартфондаги операцион тизим ва маълумот ўтказиш иловасини янгилашни тавсия қилган. Бу аниқланган заифликлардан фойдаланиш хавфини камайтиришга ёрдам беради.