Янги роутер сотиб олишга шошилманг: оддий фолга бўлаги билан Ви-Фи муаммосини ҳал қилиш мумкин

Янги роутер харид қилишга шошилманг: оддий фолга бўлаги Ви‑Фи муаммосини ҳал қилиши мумкин

Уйда Ви‑Фи сигнали айрим хоналарда яхши ишласа, бошқаларида суст бўлиши кўпчиликка таниш муаммо. Бунинг учун ҳар доим янги роутер ёки қиммат сигнал кучайтиргич олиш шарт эмас. Оддий алюминий фолга ёрдамида роутернинг сигналини керакли томонга буриш ва “ўлик зона”даги қамровни яхшилаш мумкин.

Алюминий фолга электромагнит тўлқинларни қайтариш хусусиятига эга — шу боис у мавжуд симсиз сигнални қайта тақсимлашда арзон ва самарали ёрдамчи бўла олади. Роутер Ви‑Фи сигналини барча йўналишларга тарқатади, бироқ хонадонда қурилма атрофидаги ҳамма ҳудуд ҳам бир хил қамровга муҳтож бўлавермайди. Масалан, роутер орқасида девор ёки қўшни хонадон бўлса, бундай йўналишга сигнал юборишнинг маъноси қолмайди. Бундан ташқари, деворлар ва катта мебеллар тўлқинларни тарқатиб юбориши ёки ҳатто ютиб юбориши мумкин, бу эса алоқа узилишларига олиб келади.

Агар фолгадан “экран” ясаб, уни эгиб ва махсус тарзда жойлаштирилса, у рефлектор (қайтаргич) вазифасини бажаради. Бундай экран ёрдамида ҳозир бегона хонадонга кетаётган ёки бўшлиқда йўқолиб қолаётган радиотўлқинларнинг бир қисмини нол ёки ёмон қамров зонасига — “ўлик зона”га йўналтириш мумкин. Натижада интернет яхшироқ ишлай бошлайди.

Фолга роутернинг техник қувватини оширмайди ва интернет тезлигига таъсир қилмайди. У фақат сигнал одатда етиб бормайдиган жойларга етиб боришига ёрдам беради.

Деворга шунчаки текис фолга бўлагини ёпиштиришнинг ўзи етарли эмас. Алюминий қайтаргич сифатида ишлаши учун унга тўлқинларни жамлаб, уларни хонадоннинг сиз танлаган қисмига керакли йўналишда “қайтарадиган” эгилган (ботиқ) антенна шакли бериш керак.

Сизга бир парча қалин картон, алюминий фолга ва беш дақиқа вақт керак бўлади.

Картондан тахминан 30х40 см ўлчамда тўғри бурчак қирқиб олинг. Унинг четларини эгиб, ёйсимон шаклга келтиринг.

Картон бўлагини фолга билан маҳкам ўранг, шунда унинг юзаси силлиқ, яққол букилган, йиртилган ва синган жойларсиз бўлади.

Тайёр қайтаргични роутернинг орқасига ўрнатинг ва сигнал ёмон етиб борадиган ёки умуман етиб бормайдиган хона томонга йўналтиринг.

Роутер — ҳаво айланишига муҳтож бўлган электр қурилма. Уни ҳар томондан бегона нарсалар билан тўсиб қўйиш қатъиян ман этилади. Бу қизиб кетишга олиб келади — сигнал яхшиланиш ўрнига, бутунлай йўқолиб қолиши мумкин. “Экран”ни роутернинг ёнига жойлаштиринг, лекин унга тақаб қўйманг.

Қайтаргич билан қилинган тажриба баъзи ҳолларда иш бермаслиги мумкин — хонадон плани хусусиятлари ва ишлатилган пардозлаш материалларини ҳисобга олиш лозим (баъзи материаллар сигнални “бўғиб қўйиши” мумкин). Турли ҳолатларни синаб кўринг, қиялик бурчагини ва баландликни ўзгартиринг.

Агар интернет ҳар қандай хонада ёмон ишласа, муаммо сигнал йўналишида эмас, балки роутернинг нотўғри жойлашувида бўлиши мумкин. Сигналга катта шкафлар, қалин деворлар ва баъзи изоляция материаллари тўсқинлик қилади. Қурилмани хонадон марказига кўчириб ўтказиб кўринг ёки қўшимча уланиш нуқталаридан фойдаланинг.