Янги рекорд: клублар ёзги трансферлар ойнаси вақтида қанча сарфлагани маълум бўлди

Янги рекорд: ёзги трансферлар ойнасида клублар қанча маблағ сарфлагани маълум бўлди

2026-йилги Жаҳон чемпионати ёзги трансферлар бозорини тарихдаги энг юқори даражага олиб чиқди — умумий харажатлар рекорд кўрсаткич бўлган 9,89 миллиард долларга етди. Диққатга сазовор жиҳати шундаки, ушбу сумманинг қарийб учдан бир қисми айнан мундиал иштирокчиларининг трансферларига сарфланган.

ФИФА тадқиқотларига кўра, ёзги трансферлар ойнасида Жаҳон чемпионатида қатнашган 260 дан ортиқ футболчи клубини ўзгартирган. Уларнинг трансферларидан тушган жами маблағ 3,3 миллиард долларни ташкил этган. 1-июндан 2-сентябргача бўлган даврда амалга оширилган барча халқаро трансферлар сони эса тарихда илк бор 12,5 мингдан ошди. Ташкилот ҳисоботида қайд этилишича, мундиалдаги иштирок нафақат юлдузлар, балки ёш истеъдодлар учун ҳам янги имкониятлар эшигини очмоқда.

Ёзнинг энг қиммат 5 та трансфери:

Энсо Фернандес (Аргентина) — “Челси”дан “Манчестер Сити”га (145 млн евро);

Морган Рожерс (Англия) — “Астон Вилла”дан “Челси”га (138 млн евро);

Эллиот Андерсон (Англия) — “Ноттингем Форест”дан “Манчестер Сити”га (135 млн евро);

Ян Диоманде (Кот-дъИвуар) — “Лейпсиг”дан “Реал”га (125 млн евро);

Бредли Баркола (Франсия) — “ПСЖ”дан “Ливерпул”га (125 млн евро).

Клублар қанча сарфлади ва қанча даромад олди?

Харажатлар бўйича инглиз клублари мутлақ етакчи бўлди. Улар ёз давомида футболчилар учун 3,02 миллиард доллар сарфлаган. Кейинги ўринларда Италия (1,1 млрд доллар), Испания (940 млн доллар), Германия (904 млн доллар) ва Франсия (641 млн доллар) клублари жой олган.

Футболчи сотишдан тушган даромад бўйича эса Франсия жамоалари пешқадам — 1,7 миллиард доллар. Кучли бешликни Англия (1,43 млрд), Германия (1,02 млрд), Испания (773 млн) ва Португалия (642 млн доллар) якунлаган.

Аёллар футболида ҳам рекордлар янгиланди

Аёллар футболида халқаро трансферлар харажати ўтган йилга нисбатан икки баробарга ошиб, 28,6 миллион долларга етди. Ўтишлар сони бўйича ҳам рекорд қайд этилди — 1406 та трансфер (19,2 фоизлик ўсиш).

Бу йўналишда ҳам инглиз клублари энг кўп маблағ сарфлаган (8 млн доллар). Испанлар (6,6 млн) ва немислар (4,9 млн) кучли учликдан жой олган. Аёл футболчиларни сотишдан эса энг кўп Швеция клублари (4,2 млн доллар) даромад қилган. Кейинги ўринларни Англия (4 млн) ҳамда Франсия ва Германия (3,6 млндан) клублари эгаллаган.