Янги Қарши шаҳри қурилади ва камайиб бораётган никоҳлар - маҳаллий дайжест
Қашқадарёда Янги Қарши шаҳри қурилади. Никоҳлар сони тўрт йилдан бери камаймоқда. Қашқадарё йил охиригача камбағаллик ва ишсизликдан холи ҳудудга айлантирилади. Хоразмда бир оиланинг 4 аъзоси заҳарланиб вафот этди. Куннинг муҳим янгиликлари билан таништирамиз.
Янги Қарши шаҳри қурилади ва камайиб бораётган никоҳлар - маҳаллий дайжест
Қашқадарё вилоятида 500 минг аҳолига мўлжалланган Янги Қарши шаҳри барпо этилади. Бу ҳақда президент Шавкат Мирзиёев вилоятга ташрифи чоғида ўтказилган йиғилишда маълум қилди.
Давлат раҳбарининг айтишича, Янги Қарши шаҳри Қарши шаҳри, Кўкдала ва Қарши тумани чегарасида, 5 минг гектар майдонда, 500 минг аҳолига мўлжаллаб бунёд этилади. Қарши туманидаги канал бўйида эса 235 гектарлик «Янги Насаф» экомажмуаси қурилиши бошланади.
Нуфузли архитектура компаниялари жалб қилиниб, икки ой ичида илғор шаҳарсозлик ечимларини қамраб олган бош режа ишлаб чиқилади. Уни тайёрлаш учун дастлаб 20 миллиард сўм ажратилади. Янги ҳудудларда кўп қаватли бинолар, савдо ва бизнес марказлари, уй-жойлар «яшил» ва «ақлли» шаҳар тамойиллари асосида қурилади.
Ўзбекистонда қайд этилган никоҳлар сони 2021-йилдаги 305,2 мингтадан 2025-йилда 267,1 мингтага тушди. Миллий статистика қўмитаси маълумотларига кўра, бу кўрсаткич шу даврда ҳар йили пасайиб, жами 38,1 мингтага ёки қарийб 12,5 фоизга камайган.
1991–2025-йиллар оралиғидаги энг юқори кўрсаткич 2018-йилда қайд этилган — 311,4 мингта никоҳ. 2025-йилги натижа ушбу рекорддан 44,3 мингтага ёки қарийб 14,2 фоизга паст.
1991-йилда мамлакатда 270,3 мингта никоҳ расмийлаштирилган. Демак, 2025-йилдаги мутлақ кўрсаткич 1991-йилдагидан ҳам 3,2 мингтага кам бўлган. Бироқ бу рақамлар аҳоли сонига нисбатан никоҳланиш даражасини эмас, қайд этилган никоҳларнинг умумий сонини билдиради.
Сўнгги йиллик ўзгаришларга қаралса, 2025-йилда никоҳлар сони 2024-йилга нисбатан 4,7 мингтага ёки қарийб 1,7 фоизга камайган. Тақдим этилган маълумотларда пасайиш сабаблари келтирилмаган.