Хвича учун мавсум якунланди. Унинг хочсимон пайлари узилиб кетгани тасдиқланди
«Барселона»га қарши ўйинда жароҳат олиб майдонни тарк этган футболчида жарроҳлик амалиёти ўтказилади. У камида тўққиз ойгача майдонга туша олмайди.
Хвича учун мавсум якунига етди. Унинг хочсимон пайлари узилгани тасдиқланди
Чемпионлар лигаси умумий гуруҳ босқичи 3-турида «ПСЖ» ва «Барселона» ўртасидаги учрашув (4:2) жароҳатлар билан тўлди. Биринчи бўлимдаёқ ҳар икки жамоа бош мураббийлари Луис Энрике ва Ҳанси Флик Усмон Дембеле ҳамда Дани Олмодаги жароҳатлар сабаб биттадан мажбурий алмаштиришга мажбур бўлди. Иккинчи бўлимда эса Хвича Кварацхелия оғир жароҳат олди. Гуржистонлик вингер тиззасидаги шикастланиш туфайли ўйинни давом эттира олмади. Бугун парижликлар клуби матбуот хизмати ушбу футболчининг ўнг тиззасидаги хочсимон пайлари узилганини маълум қилди.
Футболчи ўйиннинг 57-дақиқасида Хвича Кварацхелия рақиб ҳимоячиси Хави Эспарт билан тўқнашгач, ноқулай ҳолатда газонга қулади.
Дастлаб бу тўқнашувда испаниялик ҳимоячи кўпроқ азият чекканидек туюлганди, бироқ Эспарт ўрнидан туриб, ўйинни давом эттирди, Кварацхелия эса ўнг тиззасини ушлаганча газонда ётиб қолди.
59-дақиқада Луис Энрике ўз вингерини Магнес Аклиушга алмаштирди. Хвича майдонни мустақил тарк эта олмади: уни тиббиёт штабининг икки ходими елкалаб, трибуналар остига олиб кетди. Кадрларда футболчи ўнг оёғига босолмаётгани ҳам кўринди.
Ўйин давомидаёқ Кварацхелиянинг тиззасидаги хочсимон пайлари узилгани ҳақидаги тахминлар пайдо бўлди. Испаниялик физиотерапевт Анхел Вилянуева эпизод видеоёзувини таҳлил қилиб, тикланиш тўққиз ой давом этишини тахмин қилди.
«Тўқнашувда ўнг тиззанинг маҳкамланган оёқ кафти билан ичкарига мажбурий оғиши аниқ кўринади. Бундай механизм олдинги хочсимон ва ички ён бойламларнинг биргаликда шикастланишига хосдир. У тўққиз ойгача майдонга туша олмаслиги мумки», – дея ёзган Вилянуева ижтимоий тармоқларда.
«ПСЖ» ҳимоячиси Ашраф Ҳакими ўйиндан кейин хулоса қилишга чақирди.
«Усмон эртага МРТ текширувидан ўтади. Квара ҳам. Умид қиламанки, жиддий нарса йўқ», – деди марокашлик футболчи Санал+ Фоот эфирида.