Хорватия ресторанлари менюсида битта таом учун иккита нарх қўйилади
Хорватиядаги ресторанлар менюсида бир таом учун икки хил нарх кўрсатилади
1-октябрдан бошлаб Хорватиядаги ресторан ва кафеларда амалдаги нарх ёнида яна бир нарх ҳам ёзилиши мажбурий бўлади. Бу айнан шу таом ёки ичимликнинг 2026-йил 10-сентябрда амал қилган нархидир. Янги тартиб Хорватия ҳукумати қарори билан белгиланган.
Масалан, агар қаҳва ҳозир 4 евро бўлса, унинг ёнида 10-сентябрдаги нархи ҳам кўрсатилиши керак. Харидор фақат амалдаги нархни тўлайди. Иккинчи рақам эса таққослаш ва нарх қанчалик ўзгарганини кўриш учун хизмат қилади.
Бу талаб фақат босма менюларга тааллуқли эмас. Икки нарх муассасаларнинг веб-сайтларида ҳамда таом ва ичимликлар нархи кўрсатилган ташқи реклама пешлавҳаларида ҳам бўлиши шарт.
Қоидабузарлик учун жарималар белгиланган. Айрим ҳолатларда жарима деярли 2000 еврога, баъзи компаниялар учун эса 27 000 еврогача етиши мумкин.
Мамлакатдаги рестораторлар бу янгиликни аллақачон танқид қилмоқда. Загреб рестораторлар ассоциацияси раҳбари Франс Летика иккита нарх ташриф буюрувчиларни чалғитиши ва тушунмовчиликларга олиб келиши мумкинлигини айтди.