Хорижий инвесторлар кенгаши ва EUROUZ меморандум имзоладилар
Ўзбекистон президенти ҳузуридаги Хорижий инвесторлар кенгаши ва EUROUZ Европа инвестицияларини жалб қилиш ва бизнесни қўллаб-қувватлаш бўйича ҳамкорликни ривожлантиришга келишиб олдилар.
Хорижий инвесторлар кенгаши ва EUROUZ меморандум туздилар
Ўзбекистон Президенти ҳузуридаги Хорижий инвесторлар кенгаши ва Европа-Ўзбекистон иқтисодий ҳамкорлик ассоциацияси (EUROUZ) европалик компаниялар билан ишбилармонлик алоқаларини мустаҳкамлаш ҳамда мамлакатга инвестицияларни жалб қилишга қаратилган ҳамкорлик меморандумини имзоладилар.
Ҳужжат давлат органлари ва бизнес ҳамжамияти ўртасидаги ўзаро ҳамкорликни ривожлантиришни, шунингдек, Ўзбекистон бозорига киришдан манфаатдор бўлган европалик компанияларни қўллаб-қувватлашни назарда тутади.
Томонлар биргаликда ишбилармонлик тадбирлари ва бизнес-делегациялар ташрифларини ўтказиш, тажриба ва бозорлар ҳақидаги ахборотни алмашишга кўмаклашиш, шунингдек, Европа бизнесининг ўзбекистонлик ҳамкорлар билан ўзаро алоқалари имкониятларини кенгайтиришни режалаштирмоқда.
Меморандум ташкилотлар ўртасидаги узоқ муддатли шериклик учун асос бўлиши ва Ўзбекистон ҳамда Европа мамлакатлари ўртасидаги иқтисодий алоқаларни янада ривожлантиришга хизмат қилиши кутилмоқда.