Хитойлик югурувчи марафон пайтида велосипед ҳайдагани учун ҳомийсидан маҳрум бўлди
Сунь Юаньюань Берлин марафонининг бир қисмида бошқа бировнинг велосипеди орқасига минган ҳолатда суратга тушиб қолган кўринади.
**Хитойлик югурувчи марафон пайтида велосипед ҳайдагани учун ҳомийсидан маҳрум бўлди**
Хитойлик фитнес-блогер Берлин марафони вақтида велосипедда юргани учун узр сўраганидан кейин ўз ҳомийсини йўқотди.
Хитой ижтимоий тармоқларида Abeeeer номи билан танилган Сунь Юаньюань сентябрь ойида бўлиб ўтган мусобақада шахсий рекордини ўрнатганини айтган эди.
Бироқ, блогерлар томонидан жойлаштирилган нотўғри ёки чалғитувчи пойга вақтларини кузатиб борувчи Instagram саҳифаси Суннинг 35- ва 40-километрлар оралиғида велосипедда кетаётгани акс этган суратни улашди.
Кейинчалик Сунь узр сўради ва «қоидаларни бузганини» тан олди. Югуриш пойабзаллари ишлаб чиқарувчи Brooks компанияси у билан ҳомийлик шартномасини бекор қилди, марафон ташкилотчилари эса унинг маррадаги вақтини бекор қилишди.
Ўзини Марафон вақти ҳалоллиги расмий бўлими (OMTIU) деб атовчи Instagram аккаунти марафон пайтида Суннинг бошқа бир киши бошқараётган велосипед орқасига миниб кетаётгани акс этган суратни жойлаштирди.
Аккаунт, шунингдек, Суннинг «сплитлари» — пойганинг ҳар 5 километрлик қисми учун қайд этилган вақтлар жадвалини ҳам улашди.
Ушбу жадвал у гўёки велосипедда бўлган 35- ва 40-километрлар оралиғида тезлашганини кўрсатади.
Сунь Хитойнинг Rednote ижтимоий тармоғида узрнома эълон қилди ва у OMTIU томонидан ҳам улашилди. Унда Сунь қоидаларни бузганини тан олган.
У шундай деб ёзган: «Бу ҳаракатим учун ҳеч қандай баҳона изламайман.
Масофада ўзимни жисмонан ёмон ҳис қилаётган эдим, [аммо] бу қоидаларни бузиш учун асло баҳона бўла олмайди.
Қисқа йўлдан боришга уринишим мусобақанинг адолатлилиги ва марафон руҳига нисбатан ҳурматсизлик эди».
Rednote тармоғида 520 000 кузатувчисига эга бўлган Сунь, шунингдек, ўз ҳаракатларини «қасддан яширганини» айтиб, қўшимча қилди: «Бундан жуда қаттиқ айбдорлик ҳиссини туймоқдаман».
Brooks компанияси BBC News’га Сунь билан ҳамкорликни тўхтатганини тасдиқлади.
Компания баёнотида шундай дейилади: «Brooks югуриш ҳалоллик, адолат ва мусобақага бўлган ҳурматга асосланиши керак деб ҳисоблайди.
Фактларни текширгандан сўнг, Brooks China ушбу шахс билан муносабатларини узди ва бу масалани оммавий равишда ҳал қилди».
OMTIU марафончилар, айниқса фитнес-блогерлар ўртасида «GPS маълумотларини сохталаштириш, Strava иловасидаги натижаларни танлаб кўрсатиш ва сохта шахсий рекордлар даъво қилишнинг кучайиб бораётган тенденциясига» эътибор қаратиш учун ташкил этилган.
Саҳифанинг вазифаси баёнотида шундай дейилган: «Биз спортчилар оммавий равишда улашадиган вақтлар улар ҳақиқатда югурган вақтни акс эттиришини таъминлаш орқали спортнинг ҳалоллигини ҳимоя қилиш учун мавжудмиз».