Хитойлик фермер СИ тавсиясига амал қилиб, 10 гектарлик ҳосилидан айрилди

Хитойлик фермер сунъий интеллект (СИ) маслаҳатига амал қилиб, қарийб 10 гектар майдондаги кунжут ҳосилини йўқотди. Бу ҳақда маҳаллий Ствант нашри хабар берди.

Анхой провинсиясида яшовчи 67 ёшли фермер бир йилдан бери СИ ёрдамида экин экиш, ўғитлаш ва пестицидлардан фойдаланиш бўйича маслаҳатлар олиб келган. Июл ойида у кунжут даласидаги бегона ўтлар ва зараркунандаларга қарши курашиш учун СИ дан схема сўраган ва бир нечта препаратдан фойдаланиш бўйича тавсиялар олган.

Фермер агрономлар билан маслаҳатлашмасдан, тавсия этилган препаратларни далага қўллаган. Натижада, эртаси куни кунжут кўчатлари ҳам, бегона ўтлар ҳам қуриб, нобуд бўла бошлаган. Маҳаллий мутахассисларнинг таъкидлашича, тавсия этилган препаратлардан бири асосан соя далаларидаги кенг баргли бегона ўтларга қарши мўлжалланган бўлиб, уни кунжут экилган майдоннинг бутун юзасига қўллаш нотўғри бўлган.

Аввалроқ Стенфорд университети тадқиқотчилари СИ модели ёрдамида янги бактериофагларни яратган эди. Улар Э. соли бактерияларини йўқ қилишга қодир. Олимлар фаглар дизайнида Эво 2 генератив СИ моделидан фойдаланган бўлиб, бу модел мураккаб биологик масалаларни ҳал этиш ва янги ДНК кетма-кетликларини таклиф қилиш имкониятига эга.

СИ ёрдамида "геномларни лойиҳалаш" янги дори воситаларини яратишга ёрдам бериши мумкин, аммо бу тадқиқот биохавфсизлик ва биологик таҳдидлардан ҳимояланиш каби муҳим масалаларни ҳам кун тартибига қўяди.