Хитойлик блогер мушуги учун 30 минг ўриндиқли ва овозли бошқарувга эга стадион қуриб берди (видео)

Хитойлик блогер ўз мушуги учун 30 минг ўриндиқли ва овозли бошқарувга эга стадион бунёд этди.

ЁуТубеъдаги "Хинғс Ворлд" канали муаллифи, Син номи билан танилган блогер, уй ҳайвонлари учун яратган янги лойиҳаси – стадионни тақдим этди. Тўрт ойдан ортиқ вақт давомида қурилган ушбу арена юлдузи Мистер Найс лақабли мушук бўлди. Ролик якунида у ҳатто қўшиқ ҳам "ижро этди".

Син ҳайвонлар учун ноодатий иншоотлар яратиши билан машҳур. Масалан, икки йил аввал у жониворлар учун бутун бир шаҳар, бир йил олдин эса орол ва супермаркет қурган эди. 2025-йилнинг августида эса унинг каналида ҳақиқий миниметро яратилиши ҳақидаги видеоролик эълон қилинди. Муаллифнинг сўзларига кўра, унинг видеолари интернет бўйлаб жами миллиарддан ортиқ маротаба томоша қилинган.

Стадион қуриш ғояси икки сабабга кўра пайдо бўлди. Биринчидан, обуначилар тобора кўпроқ мушуклар учун футбол аренаси ясашни сўрай бошлашган. Иккинчидан, блогернинг рафиқаси стадиондаги консертларга жуда қизиқарди, аммо эри унга биринчи қаторга чипта топиб бера олмаганидан доим шикоят қиларди. Шунда Син мушуклар учун шахсий стадион қуришга қарор қилди.

Арена 30 мингдан ортиқ миниатюр томошабин ўриндиғини ўз ичига олган бўлиб, муаллифнинг аввалги ишларида бўлгани каби ақлли функсиялар билан жиҳозланган. Масалан, стадионни Сири овозли буйруқлари ёрдамида бошқариш мумкин.

Видео Мистер Найснинг чиқиши билан якунланди. Мушук қарсаклар ва нурли шоу садолари остида саҳнага чиқиб, миёвлашдан иборат қўшиғини "ижро этди". Аслида эса мушук шунчаки микрофонни ялаётган эди, қўшиқни эса кейинроқ Синнинг ўзи ёзиб қўйган.