Хитойда робот Усейн Болтнинг рекордини янгилади (видео)

Хитойда яратилган робот Усейн Болтнинг рекордини янгилади (видео)

Хитойнинг Ҳонор смартфон ишлаб чиқарувчи компанияси томонидан яратилган гуманоид робот 100 метр масофани 9,32 сонияда босиб ўтиб, ямайкалик афсонавий спортчи Усейн Болтнинг жаҳон рекордини янгилади. Бу ҳақда Реутерс хабар берди.

"Лигҳтнинг" (Чақмоқ) деб номланган ушбу робот 22-август куни Пекинда бошланган Иккинчи бутунжаҳон гуманоид роботлар ўйинларига тайёргарлик мусобақасида сониясига 14,5 метр тезликка эришди. Бу натижа Болтнинг 2009-йилда Берлиндаги Жаҳон чемпионатида ўрнатган 9,58 сониялик рекордидан тезроқдир.

Хитой гуманоид роботларни стратегик аҳамиятга эга соҳа сифатида ривожлантирмоқда. Мамлакат расмийлари ва компаниялари сунъий интеллект ва техник имкониятларнинг ривожланиши уларни ишлаб чиқариш, логистика ва маиший хизматларга жорий этишни тезлаштиришига ишонч билдирмоқда.

Шунингдек, "Лигҳтнинг" роботи апрел ойида ўтказилган Пекин ярим марафонида 21 километр масофани 50 дақиқа-ю 26 сонияда босиб ўтиб ғолиб бўлган эди. Бу натижа ҳам профессионал эркак югурувчиларнинг дунё рекордидан тезроқдир.

Ярим марафон пайтида роботнинг бўйи 169 сантиметр, оёқларининг узунлиги эса 95 сантиметр эди. Хитой Марказий телевидениесининг хабар беришича, тадқиқотчилар Бутунжаҳон гуманоид роботлар ўйинлари олдидан унинг оёқларини яна 10 сантиметрга узайтириб, 1,05 метрга етказишган.