«Хитойда капитал бор, бизга эса капитал керак» – хитойшунос олим
Азизбек Нигманов Ўзбекистон Хитой билан иқтисодий ҳамкорликдан, хусусан, инвестиция ва транспорт лойиҳаларидан фаол фойдаланиши кераклигини
«Хитойда капитал бор, бизга эса капитал керак» – хитойшунос олим
Азизбек Нигманов Ўзбекистон Хитой билан иқтисодий ҳамкорликдан, айниқса, инвестиция ва транспорт лойиҳаларидан фаол фойдаланиши лозимлигини таъкидлади.
«Қурултой» подкастининг Хитой иқтисодиёти ҳамда Марказий Осиё, жумладан, Ўзбекистон билан тарихий алоқаларига бағишланган сонида Халқаро Нордик университети доценти, иқтисодиёт фанлари бўйича фалсафа доктори (ПҳД) Азизбек Нигманов икки давлат ўртасидаги иқтисодий ҳамкорликнинг аҳамияти ҳақида фикр билдирди.
Мутахассиснинг айтишича, Хитой ва Марказий Осиё ўртасидаги муносабатлар қадимдан савдо-иқтисодий манфаатларга таянган. Бугунги кунда эса бу ҳамкорлик янги кўринишда, жумладан, инвестициялар ва йирик инфратузилма лойиҳалари орқали давом этмоқда.
«Унда капитал бор, бизда ресурс бор. Унга ресурс етишмайди, бизга капитал етишмайди. Алоқалардан фойдаланиш керак, ҳам иқтисодий, ҳам сиёсий, ҳам ижтимоий», — деди Нигманов.
Олимнинг фикрича, Хитойнинг минтақадаги иқтисодий фаоллигига фақат унинг манфаатлари нуқтайи назаридан қараш тўғри эмас. Ҳар қандай йирик халқаро лойиҳа иштирокчи давлатларга ўз манфаатларини илгари суриш учун ҳам имкон беради.
Суҳбат чоғида Хитой–Қирғизистон–Ўзбекистон темирйўли лойиҳаси ҳам муҳокама қилинди. Нигманов ушбу транспорт йўлаги Ўзбекистон учун халқаро савдо ва логистика имкониятларини кенгайтириш нуқтайи назаридан муҳимлигини қайд этди.
Унинг тушунтиришича, қадимда Буюк ипак йўлининг асосий йўналишлари Марказий Осиё орқали ўтган бўлса, замонавий транспорт тизимида айрим йирик савдо йўлаклари минтақанинг шимолидан ўтмоқда. Янги темирйўл Ўзбекистоннинг халқаро транзитдаги иштирокини кучайтиришга хизмат қилиши мумкин.
Шунингдек, лойиҳа Хитойнинг ҳам манфаатларига мос келади. Чунки Ўзбекистон орқали Туркманистон, Афғонистон ва Эрон йўналишларига чиқиш имконияти мавжуд.
Нигманов Хитой билан иқтисодий алоқаларни ривожлантиришда айнан мана шу ўзаро манфаатдорликдан фойдаланиш кераклигини таъкидлади. Унинг фикрича, Хитойнинг ресурсларга, Ўзбекистоннинг эса капитал ва инвестицияга бўлган эҳтиёжи ҳамкорликни кенгайтириш учун асос бўла олади.