Хитойда икки юқори мартабали генерал партия ва армиядан четлатилди
Хитойда икки юқори мартабали генерал партия ва армиядан четлатилди
Хитойда икки юқори мартабали ҳарбий генерал — Чжан Юся ва Лю Чженли коммунистик партия ҳамда ҳарбий хизматдан четлатилди.
Чжан мамлакат раиси Си Сзинпин қўл остида Марказий ҳарбий кенгаш раиси ўринбосари бўлган. У олий ҳарбий қўмондонлик органида иккинчи шахс саналган. Лю эса Марказий ҳарбий кенгаш аъзоси ва унинг Бирлашган штаб бошқармаси раҳбари эди.
Январ ойида Чжан ва Лю устидан тергов бошланган эди, август охирида эса улар Марказий ҳарбий кенгаш таркибидан чиқарилди. Си Сзинпин 2012-йилда ҳокимиятга келганидан бери коррупсияга қарши кенг кўламли ва интизомий кампаниялардан бирини олиб бормоқда.
Сўнгги йилларда ҳарбийлар ушбу кампаниянинг асосий нишонларидан бирига айланди. Бир қатор терговлар ва лавозимдан олишлар натижасида собиқ етти аъзодан иборат Марказий ҳарбий кенгашда фақат икки нафар фаол шахс қолди, жумладан, Хитой раиси Си Сзинпин ҳам.
Хитой раҳбарияти икки генерални партияга садоқацизликда, партия тамойилларидан воз кечганликда, қатъий интизомни таъминламаганликда, ходимлар ва оила аъзоларини назорат қилмаганликда айблади.
Синхуа давлат ахборот агентлиги расмий ҳужжатларга таяниб хабар беришича, Чжан ва Лю сиёсий интизом ҳамда сиёсий қоидаларни жиддий равишда бузган, гуруҳлар ва фраксиялар тузган, партияга содиқ бўлмаган.
Улар қизил чизиқлардан ўтгани, коррупсия орқали шахсий бойлик орттиргани ва мансабни суиистеъмол қилгани таъкидланган.
Баёнотда гап ниҳоятда катта миқдордаги маблағлар ҳақида бораётгани, уларнинг хатти-ҳаракатлари жиддий характерга эга экани ва оқибатлари ўта салбий бўлгани айтилади.
АҚШ Марказий разведка бошқармасининг Хитой бўйича собиқ таҳлилчиси ва Жоржтаун университетининг катта илмий ходими Деннис Уайлдернинг таъкидлашича, армиядаги юқори мартабали офицерларга нисбатан коррупсия айбловлари одатий ҳол бўлса-да, “садоқацизлик айбловлари мисли кўрилмаган ҳолат бўлиб, улар гуруҳ ва фраксиялар тузишни ўз ичига олади”.
Уайлдернинг айтишича, садоқацизлик ҳақидаги айбловлар “Мао даврини эслатади”. Агар бу айбловлар тасдиқланса, бу Си Сзинпин вазиятни ўз ҳокимияти ва сиёсий мавқейига жиддий таҳдид сифатида кўрганини англатиши мумкин.