Хитойда Ҳубей провинсияси собиқ партия раҳбари ўлимга ҳукм қилинди

Хитойда Хубей провинсиясининг собиқ партия раҳбари ўлим жазосига маҳкум этилди.

Хитой Коммунистик партиясининг Хубей провинсияси бўйича собиқ котиби 111 миллион доллар миқдорида пора олганликда айбланиб, ўлим жазосига ҳукм қилинди. Бу ҳақда Реутерс агентлиги хабар берди.

Нанкин шаҳар халқ суди Жианг Чаолиангга нисбатан ҳукм чиқарди. Иш материалларига кўра, у 746 миллион юандан ортиқ пора олганликда айбдор деб топилди. Суд ушбу ҳукмнинг ижросини икки йилга кечиктирди.

Агар Чаолианг шу муддат ичида янги жиноят содир этмаса, ўлим жазоси умрбод қамоқ жазосига алмаштирилади. Бунда у муддатидан олдин озод қилинмайди ва жазоси енгиллаштирилмайди.

Чаолианг 2016-йил октябридан 2020-йил февралигача партия котиби лавозимида ишлаган. Бунгача у Жилин провинсияси губернатори, Хитой Қишлоқ хўжалиги банки губернатори, Хитой Тараққиёт банки президенти ва Алоқа банки раиси каби лавозимларда фаолият юритган.

Терговчиларнинг таъкидлашича, у 1995-йилдан 2025-йилгача шартномалар тузишда ҳамда турли компаниялар ва шахсларга ёрдам беришда ўз мансаб мавқеидан фойдаланиб келган.

Аввалроқ 41 миллион долларлик коррупсияда айбланган собиқ амалдорнинг ўлимга ҳукм қилингани ҳақида хабар берилганди. Нанкин шаҳри Халқ вакиллари кенгаши қўмитасининг собиқ раҳбари Лонг Сианг пора олиш, ўзлаштириш, мансаб ваколатини суиистеъмол қилиш ва инсайдерлик учун икки йиллик кечиктириш шарти билан ҳукм қилинган эди. Суд уни умрбод сиёсий ҳуқуқларидан маҳрум этган ва барча шахсий мол-мулкини давлат ҳисобига мусодара қилишни буюрган.