Хитойда болалар боғчаси эгаси юзлаб болалар заҳарланганидан кейин умрбод қамоқ жазосига ҳукм қилинди
У ва беш нафар ходими таомларни жозибадорроқ кўрсатиш учун уларга истеъмолга яроқсиз бўёқ қўшгани аниқланди.
Хитойда юзлаб болалар заҳарланганидан кейин боғча эгаси умрбод қамоқ жазосига ҳукм қилинди
Суд ошхона ходимларига таомларнинг кўринишини яхшилаш ва кўпроқ ўқувчиларни жалб қилиш учун истеъмолга яроқсиз бўёқлардан фойдаланиш буюрилганини аниқлади.
200 дан ортиқ болани қўрғошин билан ифлосланган овқат билан заҳарлашда айбдор деб топилгач, боғча эгаси ва беш нафар ходим қамалди.
Хитой давлат оммавий ахборот воситаларининг хабар беришича, Ганьсу провинциясининг Тяньшуй шаҳридаги «Хэши Пэйсинь» болалар боғчасини бошқарган Ли Хуэйфан заҳарли ва зарарли озиқ-овқат маҳсулотларини ишлаб чиқариш ва сотишда айбланиб, умрбод қамоқ жазосига ҳукм қилинди.
2025 йил июль ойида болалар касаллана бошлаганидан сўнг, боғчанинг 247 нафар тарбияланувчиси ва ходими қонида қўрғошин миқдори меъёрдан анча юқори экани аниқланган эди.
Иш бўйича тайёрланган ҳисоботда аниқланишича, «Хэши Пэйсинь» ошпазлари кўпроқ ўқувчиларни жалб қилиш учун таомларнинг «кўринишини яхшилаш» мақсадида истеъмолга яроқсиз бўёқдан фойдаланишган, ваҳоланки бўёқ қадоғида бу ҳақда аниқ ёзиб қўйилган эди.
Ланьчжоу оралиқ халқ суди қамоқ жазоси билан бир қаторда Лининг 500 000 юань (56 200 фунт стерлинг; 74 700 доллар) қийматидаги шахсий мулкини мусодара қилиш ҳақида ҳам қарор чиқарди, деб хабар берди CCTV давлат телеканали.
Болалар боғчаси ижрочи директори Чжи Цзинлинь 15 йилга озодликдан маҳрум этилди ва 300 000 юань жаримага тортилди.
Давлат ОАВларига кўра, боғча ошхонасининг яна тўрт нафар ходими олти йилдан саккиз йилгача бўлган муддатга озодликдан маҳрум қилинган.
Суд ушбу тўрт кишига Ли ва Чжи томонидан болалар ва ходимларга бериладиган овқатга заҳарли ва зарарли масаллиқлар қўшиш ҳақида кўрсатма берилганини аниқлади.
Кейинчалик олинган озиқ-овқат намуналарида қўрғошин миқдори Хитойнинг миллий хавфсизлик меъёридан 2 000 баравар юқори экани маълум бўлди.
Заҳарланиш бўйича суриштирув «Хэши Пэйсинь» боғчасининг 235 нафар тарбияланувчиси буғда пиширилган қизил унаб (хурмо)ли пишириқ ва сосискали жўхори булочкаларини егач, қўрғошиндан заҳарланиш туфайли даволанишига тўғри келганидан кейин бошланган.
Терговчилар қизил унабли пишириқ ва жўхори-сосискали рулетлар таркибида қўрғошин миқдори тегишлича 1052 мг/кг ва 1340 мг/кг ни ташкил этганини аниқладилар, бу эса миллий озиқ-овқат хавфсизлиги стандартининг 0,5 мг/кг меъёридан анча юқори.
Жаҳон соғлиқни сақлаш ташкилоти маълумотларига кўра, қўрғошиндан заҳарланиш «айниқса ёш болалар учун жуда зарарли» ва «мия ҳамда марказий нерв тизимига жиддий шикаст етказиши» мумкин.
Кейинчалик расмийлар ўнлаб провинция мулозимлари ва шифохона ходимлари қон таҳлилларини сохталаштириш ва боғча инвесторидан пора олиш орқали ҳодисани яширишга уринганини аниқладилар.
Шундан сўнг Хитой ўқув муассасаларида овқатланишни ташкил этиш бўйича миллий кўрсатмалар тўпламини чиқарди. Чора-тадбирлар орасида ҳар бир янги озиқ-овқат туркумини текшириш ҳамда ун, гуруч ва ўсимлик ёғини фақат марказлаштирилган харид пунктларидан сотиб олиш талаби бор.