Хитой хорижда қонунни бузган фуқароларининг четга чиқишини чеклайди
Хитой 15-сентябрдан бошлаб мамлакатга кириш ва чиқиш тартибига янги қоидалар киритмоқда. Хитой Халқ Республикаси Давлат кенгаши томонидан қабул қилинган қарорга кўра, хорижда миллий хавфсизликка ва мамлакат манфаатларига таҳдид солувчи ноқонуний ёки жиноий ҳаракатлар содир этган Хитой фуқароларининг чет элга чиқиши вақтинча чекланади.
Бундай фуқаролар Хитойга қайтганларидан сўнг, уларга 6 ойдан 3 йилгача бўлган муддатга хорижга чиқиш тақиқланиши мумкин. Бу қарор ваколатли давлат органлари, жумладан, Хитойнинг дипломатик ваколатхоналари орқали маълумотлар текширилгандан сўнг қабул қилинади. Чегарани ноқонуний кесиб ўтган ёки ҳужжатларни ғаразли мақсадларда сохталаштиргани учун маъмурий қамоққа олинган фуқароларга нисбатан ҳам шундай чеклов қўлланилади.
Шу билан бирга, ижтимоий тармоқларда тарқалган "хорижда қонун бузган ҳар қандай Хитой фуқаросига 5 йилга чет элга чиқиш тақиқланади" деган хабарлар ҳақиқатга тўғри келмаслиги таъкидланди. 5 йилгача бўлган тақиқ муддати хорижий фуқаролар учун белгиланган бўлиб, миграция ва чегара қонунларини бузгани учун уларга Хитойга кириш 1 йилдан 5 йилгача тақиқланиши мумкин. Янги қоидалар Хитой Адлия вазирлиги томонидан эълон қилинди. Август ойи бошида Хитойга кириш ва чиқиш қоидалари кучайтирилиши ҳақида хабар берилганди.
31-июл куни қабул қилинган ушбу 19 моддадан иборат низом хорижга парвозлар хавфсизлигини таъминлаш, мамлакатдан чиқиш ва кириш бўйича аризаларга қўйиладиган талабларни аниқлаштириш ҳамда воситачилик хизматларини тартибга солишни назарда тутади.
**Чиқиш қоидалари:**
Хитой фуқаролари мамлакатни тарк этиш учун топширадиган аризада сафар сабабини қонуний ва аниқ кўрсатиши, шунингдек, текширув жараёнида ҳамкорлик қилиши шарт. Таклифнома юборган ташкилот ёки шахс тақдим этилган маълумотларнинг ҳаққонийлиги учун жавобгар бўлади. Агар ёлғон ҳужжатлар ёки нотўғри маълумотлар тақдим этилса, иммиграция органлари сафар ҳужжатларини беришни рад этиши ёки мамлакатдан чиқишни тақиқлаши мумкин. Бундан ташқари, Хитой расмийлари уруш, қуролли можаро, табиий офат ёки юқумли касалликлар авж олган ҳудудларга йўл олаётган фуқароларни огоҳлантириб, бундай сафарлардан воз кечишни тавсия қилади.
**Кириш қоидалари:**
Хитой визаси, мамлакатга кириш, қолиш ёки яшаш рухсатномасини олиш учун ариза топшираётган хорижликлар ҳам фақат тўғри ва ишончли маълумот тақдим этиши шарт. Ёлғон маълумот берган, чегара тартибини бузганлик учун жиноий жавобгарликка тортилган ёки ҳужжатларни қалбакилаштиргани учун маъмурий жазога тортилган шахсларга Хитойга кириш рад этилиши мумкин. Шунингдек, иммиграция, виза органлари ёки Хитой қонунчилигига мувофиқ чеклов қўлланган чет эл фуқароларининг мамлакатга кириши ҳам чекланади.