Хитой тижорат кемалари ҳарбий алоқа сигналларини кузатаётгани иддао қилинди
Хитойнинг йирик СОССО юк ташиш компаниясига тегишли тижорат кемалари яширин радиоелектрон разведка платформалари сифатида ишлатилаётган бўлиши мумкин. Реутерс суҳбатлашган АҚШ маъмурияти вакилларига кўра, бундай кемалар Европа, Шимолий Америка ва Осиёдаги денгиз ҳамда ҳаво транспорт воситаларидан тарқаладиган алоқа сигналларини тутиб олиш имконига эга. Хитой томони эса бу даъволарни рад этган.
Хитой тижорат кемалари ҳарбий алоқа сигналларини кузатаётгани айтилди
Реутерс агентлиги АҚШ президенти Доналд Трамп маъмуриятининг исми ошкор этилмаган икки вакилига таяниб, Хитойнинг СОССО юк ташиш компанияси кемаларидан радиоелектрон разведка маълумотларини йиғиш учун фойдаланаётгани ҳақида хабар берди.
АҚШ расмийларининг баҳолашича, СОССО ўнлаб йиллар давомида Пекин билан разведка маълумотларини тўплаш йўналишида ҳамкорлик қилиб келган. Таъкидланишича, бундай тизим Хитойга Европа, Шимолий Америка ва Осиё ҳудудларида ҳаракатланаётган кемалар ҳамда ҳаво кемаларидан тарқаладиган алоқа сигналларини тутиб олиш имконини бериши мумкин.
Хитойнинг Вашингтондаги элчихонаси вакиллари эса бу айбловларни инкор этган.
Радиоелектрон разведка учун мўлжалланган махсус ускуналар ҳажми, тузилиши ва имкониятларига қараб турлича бўлиши мумкин. Улар нисбатан кичик ва оддий қурилмалардан тортиб, мураккаб разведка комплексларигача етиши мумкин.
Замонавий йирик тижорат кемалари одатда кўплаб антенналар, алоқа ва навигация воситалари билан жиҳозлангани сабабли, бундай махсус ускуналарни ташқи томондан сезилмайдиган тарзда жойлаштириш техник жиҳатдан мумкинлиги қайд этилган.
Кемалар орқали тўпланган разведка маълумотлари кейин қандай ишлатилиши аниқ эмас. Бироқ бортдаги тизимлар қабул қилинган маълумотларни ёзиб олиши ва кейинчалик хавфсиз шароитда уларни бошқа марказларга жисмоний ташувчилар ёки алоқа каналлари орқали етказиши мумкин.
Оддий пассив радиоелектрон разведка комплекслари автоном тарзда ишлай олади. Мураккаброқ тизимлар эса кема сунъий йўлдош алоқасига уланган тақдирда дунёнинг исталган нуқтасидан масофадан бошқарилиши мумкин. Ҳозирги вақтда юқори тезликдаги сунъий йўлдош алоқаси жаҳондаги тижорат кемаларида кенг қўлланади.
Шунингдек, бундай тизимларни бевосита кема бортида бўлган мутахассислар бошқариши мумкин. Улар ускуналар ишлашини назорат қилиш билан бирга, тутиб олинган ва разведка учун қизиқиш уйғотадиган сигналларни дастлабки таҳлилдан ўтказиш имконига ҳам эга бўлиши мумкин.
Кемалар махсус маълумот узатиш каналлари билан жиҳозланган бўлса, тўпланган ахборотни деярли реал вақт режимида разведка тармоғининг бошқа нуқталарига, жумладан Хитой ҳудудидаги марказларга юбориш имкони пайдо бўлади. У ерда маълумотлар кейинги таҳлил ва фойдаланиш учун қайта ишланиши мумкин.
Реутерс манбаларига кўра, разведка платформаси сифатида мослаштирилган тижорат кемаларининг устувор вазифаларидан бири ҳарбий алоқа технологиялари ҳамда шифрлаш воситаларининг ривожланиши ҳақида маълумот тўплаш бўлиши мумкин.