Хитой разведкаси раҳбари сунъий интеллектни миллий хавфсизликка таҳдид деб атади
Хитой Давлат хавфсизлик вазирлиги раҳбари Чен Исин сунъий интеллект мамлакат миллий хавфсизлиги учун жиддий хавф туғдириши мумкинлигидан огоҳлантирди. Унинг сўзларига кўра, хорижий кучлар ундан ахборот уруши, киберҳужумлар ва махфий маълумотларни йиғишда фойдаланмоқда.
Хитой разведкаси раҳбари сунъий интеллектни миллий хавфсизлик учун хавф деб баҳолади
Унинг айтишича, “душман кучлар” сунъий интеллектдан сиёсий миш-мишлар ва зарарли маълумотларни ёйиш, шунингдек, Хитойга қарши “когнитив уруш” юритиш учун фойдаланмоқда. Ченнинг сўзларига кўра, бундай технологиялар мамлакатнинг сиёсий, институционал ва мафкуравий хавфсизлигига бевосита таҳдид туғдиради.
Шунингдек, у сунъий интеллектнинг киберҳужумлар учун имкониятлари кенгайиб бораётгани сабабли муҳим ахборот инфратузилмаси ҳам хавф остида эканини таъкидлади. Идора раҳбари хорижий махсус хизматлар давлат маълумотлари, тижорат сирлари ва фуқароларнинг шахсий маълумотларини ўз ичига олган махфий ахборотни кенг кўламда тўплаш учун интеллектуал тизимлардан фойдаланаётганини қайд этди.
Чен сунъий интеллектни глобал технологик рақобатнинг асосий йўналишларидан бири ва йирик давлатлар ўртасидаги стратегик рақобатнинг янги майдони деб атади. У Хитойни сунъий интеллект моделларини ўқитиш учун зарур бўлган илғор компютер чипларини ишлаб чиқариш каби асосий технологияларда мустақилликни таъминлашга чақирди.
Бу огоҳлантириш Хитой раиси Си Жинпинг ва АҚШ президенти Жо Байденнинг Вашингтондаги учрашувига тайёргарлик кўрилаётган бир пайтда янгради. Хавфсизлик ва сунъий интеллектни тартибга солиш масалалари музокараларнинг асосий мавзуларидан бири бўлиши кутилмоқда.
Бир кун аввал АҚШ собиқ президенти Барак Обама, агар ҳукумат сунъий интеллект ривожини назорат қилишнинг аниқ қоидаларини ишлаб чиқмаса, у хавфли тус олиши мумкинлиги ҳақида огоҳлантирган эди.