Хитой Ўзбекистонга соғин сигирлар экспортини оширмоқда
Хитойнинг Учжун шаҳридан Ўзбекистонга навбатдаги 478 бош йирик шохли қорамол экспорт қилинди. 2025-йил ноябр ойидан буён эса мазкур шаҳардан мамлакатга жами 1 700 бошдан ортиқ қорамол етказиб берилган бўлиб, уларнинг асосий қисмини соғин сигирлар ташкил этади.
Хитой Ўзбекистонга соғин сигирлар етказиб бериш ҳажмини оширмоқда.
"Синхуа" ахборот агентлигининг хабар беришича, Хитойнинг шимоли-ғарбий қисмидаги Учжун шаҳридан Ўзбекистонга навбатдаги партия жўнатилди.
Маҳаллий ҳокимият органлари экспорт қилинаётган барча қорамолларнинг ветеринария-санитария талабларига тўлиқ мос келишини таъкидлади. Ҳар бир ҳайвон учун дезинфексия ва иммунизациядан ўтганлигини тасдиқловчи ҳужжатлар, шунингдек, карантин сертификати расмийлаштирилган.
Учжун шаҳар Қишлоқ хўжалиги ва қишлоқ ишлари бошқармаси маълумотларига кўра, маҳаллий соғин сигирлар юқори маҳсулдорлиги ва кучли генетик салоҳияти билан ажралиб туради. Бундан ташқари, ҳудудда эпизоотик касалликларнинг олдини олиш бўйича юқори стандартлар узоқ йиллардан буён қўлланилиб келинмоқда.
Мутахассисларнинг фикрича, Учжун ва Марказий Осиё мамлакатларининг иқлим шароити ўхшаш бўлганлиги сабабли, бу ерда парвариш қилинган соғин сигирлар Ўзбекистон шароитига тезроқ мослашади.