Хитой баҳсли ҳудудда сунъий орол қурмоқда
Хитой баҳсли ҳудудда сунъий орол қуриш ишларининг биринчи босқичини якунлади. Бу обьект Парасел архипелагидаги Антелоп рифида жойлашган бўлиб, таҳлилчиларнинг фикрича, у мамлакатнинг энг йирик ҳарбий базасининг бир қисмига айланади. Бу ҳақда Реутерс агентлиги хабар берди.
Нашр томонидан кўриб чиқилган сунъий йўлдош тасвирларига кўра, олти ойлик қурилиш ишларидан сўнг кемалар ва дреджерлар (сув тубидаги лой, қум, шағал ва тупроқни кавлаб олиш ҳамда тозалаш учун мўлжалланган махсус техника ёки кема) ҳудудни тарк этган. Вантор компанияси томонидан 19-июлда олинган суратларда оролнинг жануби-шарқий қисмида вертолёт майдончаси ва бошқа бинолар қурилиши бошлангани кўринади.
Хитой Мудофаа вазирлиги бу ҳолат бўйича изоҳ бермади. Расмий ОАВга кўра, бу обьект об-ҳаво прогнози ва илмий тадқиқотлар каби фуқаролик эҳтиёжларига хизмат қилади. Бироқ экспертлар орол Хитойнинг минтақадаги ҳарбий мавқейини мустаҳкамлашига ишонч билдирмоқда.
Оролнинг узунлиги деярли 6 километрни ташкил этади. У ердаги 3 километрдан ортиқ тўғри қирғоқ чизиғида учиш-қўниш йўлаги барпо этилиши мумкин. Шунингдек, у ерда 680 метрлик чуқур сув порти ҳам қурилган.
Антелоп рифи Тайван билан можаро юзага келган тақдирда муҳим стратегик нуқтага айланади. Мутахассис Бен Люиснинг фикрича, у яқинроқдаги Вуди оролидан каттароқ ва мудофаа учун қулайроқдир.
Хитойлик олим Дин Дуо эса бу ишларни тинчликсевар мақсадларда амалга оширилаётганини таъкидлади. Бироқ Вьетнам бу ҳаракатларга кескин қаршилик билдириб, орол устидан ўз суверенитетини даъво қилмоқда.
Орол Хитойга сувости кемаларини ва атрофдаги ҳарбий ҳаракатларни кузатишда катта устунлик беради. Австралиялик профессор Карл Таернинг айтишича, бу обьектлар тинчлик даврида АҚШ ва унинг иттифоқчиларини кузатишни осонлаштиради, уруш пайтида эса қўшимча мураккабликлар туғдиради.
Аввалроқ Филиппин ва Хитой денгиздаги тўқнашув сабаб бир-бирининг элчиларини чақиртиргани ҳақида хабар берилганди. Ўшанда Жанубий Хитой денгизидаги баҳсли ҳудудда рўй берган тўқнашув ва ҳарбийларнинг жароҳат олиши Манила ҳамда Пекин ўртасидаги дипломатик муносабатларни кескинлаштириб юборган.