Хавф туғдирадими?..
Литва Марказий Осиёдан ишчи кучи учун аризалар қабул қилишни вақтинча тўхтатди
Хавф туғдирадими?..
Литва расмийлари Марказий Осиё мамлакатлари фуқароларидан ишга жойлашиш учун ҳужжатларни қабул қилишни вақтинча тўхтатди. Бунинг учун Қирғизистон, Ўзбекистон ва Қозоғистондаги виза марказларини ёпишга қарор қилинди. Ушбу марказлар чет элликлар ва Литва муассасалари ўртасида воситачилик қилар эди. Идора тартиб-таомиллар айнан қачон тикланишини ҳозирча маълум қилмаяпти.
Республика Миграция департаменти раҳбарининг маълум қилишича, бу чора сўнгги бир йил ичида иш изловчилар сонининг кескин ортиши билан боғлиқ бўлиб, шу сабабли ушбу мамлакатлардаги виза марказлари аризалар билан ишлашни тўхтатишга мажбур бўлган.
2026 йил сентябрь ойи бошида Литвага ишга келаётган чет элликлар учун жорий йилга белгиланган 24,7 минг кишилик квота тўлиқ тугади. У тугаганидан кейин ишга жойлашиш асосида вақтинча яшаш учун рухсатномалар фақат қонунда назарда тутилган ҳоллардагина берилиши мумкин.
Миграция департаментининг 2026 йил 1 сентябрдаги маълумотларига кўра, деярли 227 минг чет эллик Литвада амалдаги яшаш ҳуқуқига эга. Улардан 80 минг нафари — Украина фуқаролари, деярли 48 минг нафари — Беларусь фуқаролари, 13 минг нафари — Россия, тахминан шунча миқдорда Ўзбекистон фуқаролари, 9,4 минг нафари — Ҳиндистон, 7,4 минг нафари — Тожикистон фуқароларидир.
Бу каби чекловлар биринчи марта жорий этилаётгани йўқ: 2025 йилда Литва томони кириб келаётганлар томонидан тизимли қоидабузарликлар содир этилгани сабабли Душанбедаги виза маркази фаолиятини вақтинча тўхтатган эди. Ваколатхонанинг икки йиллик фаолияти давомида 6,5 мингга яқин киши Литвада яшаш ҳуқуқини расмийлаштирган бўлиб, уларнинг аксарияти қурувчи ва ҳайдовчи сифатида малакага эга бўлган. Бироқ текширувлар шуни кўрсатдики, кўплаб меҳнат мигрантлари олинган ҳужжатлардан фақат Европа Иттифоқининг бошқа давлатларида ҳақиқатда ишга жойлашиш мақсадида транзит учун фойдаланганлар.