Вьетнамда мушуклар контрабандаси билан шуғулланувчи тармоқни бошқарганликда гумонланиб, ўн икки киши ҳибсга олинди
Бу кишилар Хошимин шаҳрида 2700 га яқин мушукни гўшти учун сўйиш мақсадида ўғирлаганликда айбланмоқда.
Вьетнамда мушукларнинг ноқонуний савдоси билан шуғулланувчи гуруҳга алоқадорликда гумонланиб, 12 киши ҳибсга олинди
Вьетнамда 2700 га яқин мушукни ўғирлаш ва сотишда айбланаётган 12 эркак қўлга олинди, деб хабар берди Хошимин шаҳри полицияси.
Тергов давомида мусодара қилинган ашёлар орасида мушук тузоқлари, жун тозалаш машиналари ва тарозилар бор. Эркаклар ҳайвонларни гўшт учун сўйиш мақсадида олиб кетганликда гумон қилинмоқда.
Полициянинг маълум қилишича, гумонланувчилар тунда мотоциклларда кичик гуруҳларга бўлиниб, мушукларни ўғирлаш учун турар жой мавзелари бўйлаб ҳаракатланишган.
Давлат ОАВларининг хабар беришича, эркаклар балиқ бўлакларидан хўрак сифатида фойдаланиб, мушуклар боқилишини билган уйлар ташқарисида тузоқлар ўрнатишган. Қутқарилган мушуклардан 13 таси ўз эгаларига қайтарилди.
«Humane World for Animals» ҳайвонларни ҳимоя қилиш ташкилотининг маълум қилишича, Вьетнамда ҳар йили тахминан беш миллион ит ва бир миллион мушук тутилади, ўғирланади, ноқонуний сотилади ва гўшти учун сўйилади.
Мамлакатда ит ва мушук гўштини истеъмол қилиш қонуний ҳисобланади, кўплаб ресторанлар уни ўз менюларига очиқчасига киритади. Бироқ, сотувчилар ҳайвонларнинг келиб чиқишини исботловчи рухсатномаларга эга бўлишлари керак.
Хошимин шаҳар полиция бошқармасининг расмий газетасида эълон қилинган полиция баёнотига кўра, ҳар бир гуруҳ тунда ўртача тўрттадан 10 тагача мушук ўғирлаганликда айбланмоқда.
8 июль куни полиция 50 та мушук, иккита тарози, 55 та мушук тузоғи, 14 та қоп, 13 та мобил телефон, еттита мотоцикл, иккита жун тозалаш машинаси ва 6,7 миллион Вьетнам донги ($257; £195) мусодара қилинганини маълум қилди.
Шундан сўнг 12 нафар гумонланувчи сўроқ қилинди ва полициянинг билдиришича, улар 2700 га яқин мушукни ўғирлаганликларини тан олишган.
Мусодара қилинган 50 та мушукдан 13 таси эгаларига қайтарилди, қолганлари эса «HavePaws» ҳайвонларни ҳимоя қилиш марказида парвариш қилинмоқда.
Вьетнамда ит ва мушук гўштини истеъмол қилиш Осиёнинг бошқа мамлакатларига қараганда ҳали ҳам кенг тарқалган бўлса-да, фаолларнинг айтишича, бунга бўлган муносабат ўзгармоқда.
«Humane World for Animals» ташкилоти томонидан 2023 йилда ўтказилган сўровнома жамоатчиликнинг, айниқса, ёшлар ва уй ҳайвонлари эгаларининг норозилиги ортиб бораётганини кўрсатди: респондентларнинг 71 фоизи мушук гўштини истеъмол қилиш ва сотишни тақиқлашни қўллаб-қувватлаган.
Ҳайвонларни ҳимоя қилиш гуруҳининг маълум қилишича, июнь ойида расмийлар мушук ўғрилиги билан шуғулланувчи яна бир гуруҳни фош қилганидан сўнг, сўйишга мўлжалланган 400 дан ортиқ мушук қутқариб қолинган.