Вьетнамда гиёҳванд моддалар контрандаси иши бўйича 11 киши ўлим жазосига ҳукм қилинди
Тиш пастаси тубалари ва бошқа истеъмол товарларида Вьетнамга гиёҳванд моддаларни контрабанда йўли билан олиб кирган тармоқ иши бўйича 200 дан ортиқ киши айбдор деб топилди.
Вьетнамда гиёҳванд моддалар контрабандаси иши бўйича 11 киши ўлим жазосига ҳукм қилинди
Вьетнам суди мамлакат тарихидаги энг йирик гиёҳванд моддалар контрабандаси ишларидан бири бўйича 11 кишини ўлим жазосига ҳукм қилди, деб хабар бермоқда давлат ОАВлари.
Улар умумий ҳисобда 227 нафар судланувчи орасида бўлиб, қолганларга 18 ойдан умрбод озодликдан маҳрум қилишгача бўлган қамоқ жазолари тайинланган.
Ўлим жазосига ҳукм қилинганлар орасида контрабанда тармоғининг тахминий раҳбари Ха Дань Нам ҳам бор. Терговчиларга кўра, у гиёҳванд моддаларни Франциядан Вьетнамга ташишни ташкиллаштирган.
Мазкур иш 2023 йилнинг март ойида, Париж-Хошимин рейси билан учиб келган Vietnam Airlines авиакомпаниясининг тўрт нафар борт кузатувчиси юкидан 157 та тиш пастаси тюбиклари ичига яширилган 10 килограммдан ортиқ гиёҳванд моддалар топилганидан кейин бошланган эди.
Ҳуқуқий масалаларни ёритувчи «Бао Конг Ли» газетасининг хабар беришича, расмийлар жиноий жавобгарликка тортилмаган борт кузатувчилари ўзлари билмаган ҳолда таркибида МДМА ва кетамин бўлган гиёҳванд моддаларни олиб ўтган деган хулосага келишган.
Нам гиёҳванд моддаларни парҳез қўшимчалари, кир ювиш кукуни, оғиз бўшлиғини чайқаш воситаси ва кофе каби истеъмол товарлари ичига яширган, сўнгра Франциядаги одамлар орқали уларни юкларида олиб ўтишни ёки курьерлик хизматлари орқали Вьетнамга юборишни ташкил қилган.
Маҳаллий ОАВ хабарига кўра, Нам Францияда яшовчи ёки таҳсил олаётган Вьетнам фуқароларини курьер сифатида жалб қилган.
Прокурорларнинг таъкидлашича, ушбу трансчегаравий контрабанда тармоғи аъзолари ўз фаолиятини амалга ошириш учун шифрланган мессенжерлар ва бошқа шахслар номига очилган банк ҳисоб рақамларидан фойдаланишган.
Уларнинг сўзларига кўра, тармоқ билан боғлиқ транзакциялар қиймати деярли 29 триллион Вьетнам донгини ($1,1 млрд; £815 млн) ташкил этган.
Суднинг билдиришича, судланувчилар тармоқда раҳбарликдан тортиб шерикликкача бўлган турли ролларни бажаришган ва жазолар уларнинг иштироки даражасига қараб белгиланган.
Яна 20 га яқин судланувчи гиёҳванд моддаларни ноқонуний сотиб олиш, сотиш, ташиш ва ташкил этиш учун умрбод қамоқ жазосига ҳукм қилинди.
Amnesty International ташкилотига кўра, Вьетнам ҳали ҳам ўлим жазосини сақлаб қолаётган 53 та давлатдан биридир.
Ҳукумат ўлим жазосига ҳукм қилинганлар сонини ошкор қилмайди, чунки бу маълумот давлат сири ҳисобланади, бироқ инсон ҳуқуқлари ташкилотлари 1000 дан ортиқ одам қатл этилишини кутаётганини айтмоқда.
Ўтган ойда Вьетнам ҳукумати олтита жиноят, жумладан, гиёҳванд моддалар контрабандаси учун ўлим жазосини бекор қилишни таклиф қилди. Ушбу таклиф этилаётган ўзгартиришлар ҳали кучга киргани йўқ.
Ушбу таклиф жиноят кодексига киритилган 2025 йилги ўзгартиришлардан сўнг илгари сурилди. Ўша ўзгартиришларга кўра, саккизта жиноят, жумладан, ўзлаштириш, жосуслик ва ҳукуматни ағдариш учун ўлим жазоси бекор қилинган эди.
Ўлим жазосига ҳукм қилинган энг таниқли шахслардан бири магнат Чыонг Ми Лан бўлиб, у ўзлаштиришда айбланиб, 2024 йилда ўлим жазосига ҳукм қилинган эди.
2025 йилги қонунчиликдаги ўзгаришлардан сўнг, унинг ўлим жазоси умрбод қамоқ жазосига алмаштирилди.