Volkswagen директорлар кенгаши 100 000 та иш ўрнини қисқартириш режасини маъқуллади
Таркибига Audi, Porsche, Skoda, шунингдек, VW бренди кирувчи гуруҳ март ойида 50 000 та иш ўрнини қисқартиришини маълум қилган эди.
Volkswagen директорлар кенгаши 100 000 та иш ўрнини қисқартириш режасини маъқуллади
Германиянинг Volkswagen автомобиль гиганти директорлар кенгаши кенг кўламли соғломлаштириш дастури доирасида яна 50 000 та иш ўрнини тугатиш режасини тасдиқлади. Бу билан компания 2030 йилгача қисқартиришни режалаштираётган иш ўринларининг умумий сони 100 000 тага етади.
Таркибига Audi, Porsche, Skoda ва VW брендлари кирувчи гуруҳ шу йилнинг март ойида ўн йилликнинг охиригача 50 000 та иш ўрнини қисқартиришини маълум қилган эди.
Бу қадам компания келажаги учун «кучли сигнал» бўлиб, у «бутун ишчи кучимиз учун масъулиятни ўз зиммасига олмоқда», деди пайшанба кунги баёнотида VW бош ижрочи директори Оливер Блюм.
Блюм июль ойида BBC'га берган интервьюсида компания қўшимча қисқартиришларни амалга ошириш имкониятларини кўриб чиқаётганини айтган эди.
Компания сотувлар ҳажмининг камайиши ва айниқса Хитой брендлари томонидан кучли рақобат фонида фойданинг пасайишидан зарар кўрди.
VW баёнотида, шунингдек, ўзгарувчан талаб ва технологик ўзгаришларга дуч келаётган компаниянинг рақобатбардошлигини ҳимоя қилиш учун «глобал ишчи кучи салоҳиятини тубдан мослаштириш зарур» эканлиги айтилган.
Унда «Гуруҳ миқёсида тахминан 50 000 та иш ўрнини, шу жумладан раҳбарлик лавозимларини қисқартириш зарурий чора бўлади», деб қўшимча қилинган.
2025 йил ҳолатига кўра, машҳур «Beetle» («Қўнғиз») автомобили ишлаб чиқарувчисида бутун дунё бўйлаб 660 000 дан ортиқ киши меҳнат қилган.