“Вест Ҳем” исроиллик футболчини сотиб олгани учун кескин танқид қилинмоқда
“Вест Ҳем” исроиллик футболчини сотиб олгани учун қаттиқ танқидга учрамоқда
Англиянинг “Вест Ҳем” клуби 27 ёшли исроиллик футболчи Манор Соломонни ўз сафига қўшиб олгани сабабли жиддий танқидларга дуч келмоқда. Футболчининг Ғазодаги уруш фонида Исроилни очиқчасига қўллаб-қувватлагани ижтимоий тармоқларда мухлисларнинг кескин норозилигига сабаб бўлди.
Премьер Лигадан тушиб кетган Лондон клуби ушбу футболчини “Тоттенҳем”дан сотиб олди. Дастлабки шартнома қиймати 5 миллион фунт (6,75 миллион доллар) этиб белгиланган бўлса-да, бонуслар билан бу сумма 7 миллион фунтгача (9,45 миллион доллар) кўтарилиши мумкин.
Исроиллик футболчининг трансфери кўплаб баҳс-мунозараларни келтириб чиқарди. Соломон 2023-йил октябр ойидаги воқеалардан сўнг ўзининг Инстаграм саҳифасида “Исроил ўзини ҳимоя қилишга ҳақли” эканини ёзиб, кузатувчиларини “Исроил учун ибодат қилишга” чақирган эди. Шунингдек, у фаластинликларни ўз халқини ўлдиришда айблаган постларни ҳам улашган.
Бундай хатти-ҳаракатлар унинг аввалги жамоаларида ҳам муаммоларни келтириб чиқарган. Хусусан, 2025-йилнинг сентабр ойида “Вилярреал”га ўтганида, испан клуби мухлислари ижтимоий тармоқларда бойкот эълон қилган эди. Кейинчалик “Севиля”га қарши сафар учрашувида стадионда Фаластин байроқлари кўтарилиб, футболчига нисбатан ҳуштакбозлик қилинган.
Айни пайтда “Вест Ҳем”нинг ижтимоий тармоқлардаги саҳифалари ҳам икки қутбга бўлинган: баъзилар “Фаластинга озодлик” деб ёзаётган бўлса, бошқалар Исроил байроғини қолдириб, Соломонни қўллаб-қувватламоқда.
Клуб мухлислари бу борада турлича фикрда. Жумладан, 28 ёшли мухлис Каллум Гордон спорт ва сиёсатни ажратиш тарафдори эканини билдирди: “Мен уни фақат футболчи сифатида баҳолашни ва майдонда қандай фойда келтира олишига эътибор қаратишни афзал кўраман”.
20 ёшли Лола Райт исмли мухлис эса Ғазодаги ҳолатни геноцид деб ҳисоблашини ва Соломоннинг позициясига қарши эканини таъкидлади: “Унинг яхши футболчи эканини инкор этиб бўлмайди. Аммо бу мавсум биз учун жамоавий руҳ ва мухлислар ўртасидаги боғлиқлик муҳимроқ. Бу трансфер ҳар иккала жиҳатга салбий таъсир кўрсатиши аниқ”.
Футболчининг Исроил армиясида хизмат қилгани борасидаги хабарлар ҳам танқидларни янада кучайтирмоқда. Гарчан унинг бевосита жанговар ҳаракатларда иштирок этгани ҳақида аниқ далиллар бўлмаса-да, фаластинликлар учун бу ҳолат барибир оғриқли қабул қилинади.
Маълумот ўрнида, Фаластин Футбол Ассоциацияси статистикасига кўра, 2026-йилнинг 12-феврал ҳолатига қадар Ғазодаги спорт ҳамжамиятининг 1007 нафар вакили, жумладан, 565 нафар футболчи ҳалок бўлган. Ҳудуддаги 265 та спорт иншоотига жиддий зарар етказилган.