Вермонтлик эркак уч нафар фаластинликни отиб қўйгани учун қотилликка уринишда айбдор деб топилди
2023 йил ноябрдаги отишма Исроил-Ғазо уруши бошланганидан кейин исломофобия ва антисемитизм кучайган бир пайтда юз берди.
Вермонтлик эркак уч нафар фаластинликни отиб ташлаганидан кейин қотилликка суиқасд қилишда айбдор деб топилди
Бундан деярли уч йил аввал Вермонтда уч нафар фаластинлик университет талабасини отиб ташлаган эркак қотилликка суиқасд қилишда айбдор деб топилди, ҳакамлар ҳайъати унинг руҳий касаллик ҳақидаги ҳимоясини рад этди.
51 ёшли Жейсон Итоннинг адвокатлари у Вермонт университети яқинида Ҳишам Авартани, Таҳсин Алиаҳмад ва Киннан Абдалҳамидга ҳужум қилишдан олдин радио орқали Марказий разведка бошқармаси (МРБ) ва Моссаддан кимнидир отиб ташлаш ҳақида буйруқ эшитганини ўйлаганини айтишди.
Итон ўқ узган шахс ўзи эканлигини инкор этмади, бироқ руҳий касаллиги сабабли ўзини айбдор деб тан олмади. Ҳозирда у ҳукм чиқарилишини кутмоқда ва умрбод қамоқ жазосига маҳкум этилиши мумкин.
2023 йил ноябрдаги ҳужум оқибатида Авартани белдан пасти фалаж бўлиб қолди, қолган икки йигит эса жароҳат олди.
Бир ҳафта давом этган суд жараёнида ҳозирда 23 ёшда бўлган уч нафар талабанинг, шунингдек, ҳимоя ва қораловчи томонлар чақирган психиатрларнинг кўрсатмалари тингланди.
Associated Press агентлигининг хабар беришича, ҳакамлар ҳайъати айблов ҳукмини ўқиб эшиттираётганда Итон ҳиссиз тикилиб турган, судда ногиронлар аравачасида қатнашган Авартани ва Алиаҳмад эса табассум қилиб, атрофидагиларни қучоқлашган.
Унинг ҳимоя гуруҳи Итон воқеадан бир неча ҳафта олдин кредит уюшмасидаги ишини йўқотганидан кейин унинг руҳий саломатлиги ёмонлашгани ва бу психозга олиб келганини таъкидлади.
Итоннинг адвокатлари у МРБ маҳаллий радиоэшиттириш орқали у билан гаплашаётганига ва унга "кўчага чиқиб, кимнидир отиб ташлашни" айтаётганига ишонганини билдиришди.
"У буни давлат идораси ёки Худо томонидан буюрилган деб ишонган", деди ҳимоячи Жошуа О'Хара.
Отишма давом этаётган Исроил-Ғазо уруши бошланганидан бир ой ўтиб ҳамда АҚШда исломофобия ва антисемитизм кучайган бир пайтда содир бўлган.
Хабар қилинишича, воқеа уч йигит Итоннинг уйи яқинида араб ва инглиз тилларини аралаштириб гаплашиб, кефия деб номланувчи анъанавий фаластинлик рўмолларини ўраб кетаётган пайтда юз берган.
Абдалҳамид Хаверфорд коллежи талабаси эди. Авартани Род-Айленддаги Браун университетида, Аҳмад эса Коннектикутдаги Тринити коллежида таҳсил оларди.
Учови илгари Рамаллаҳда бирга ўқишган ва Шукрона куни муносабати билан Авартанининг бувисиникига меҳмонга келишган эди.