Венгрия бош вазири мамлакатда Украина учун нефт омбори қурилишига қарши чиқди
Венгрия бош вазири мамлакатда Украина учун нефт омбори қурилишига қарши чиқди
Венгрия бош вазири Петер Мадяр мамлакат ҳудудида Украина учун нефт омбори барпо этилишига қарши эканини билдирди.
Қурилиш бўйича меморандум сентябр ойида Украинанинг “Нафтогаз” ва Венгриянинг “МОЛ” компаниялари ўртасида имзоланган эди. Мадяр 21-сентябр куни парламентдаги чиқишида, агар унинг “Тиса” партияси ҳокимиятда бўлса, бундай қурилишга йўл қўйилмаслигини айтди. Бош вазир “МОЛ” раҳбариятига ўз позициясини маълум қилиб, давлат ушбу компанияда 25 фоиз улушга эгалигини ҳам эслатди.
“МОЛ” билан меморандум имзоланганини 20-сентябр куни “Нафтогаз” раҳбари Сергей Федоренко маълум қилган эди. Битим Карпат иқтисодий форуми доирасида тузилган. У Венгрия-Украина чегараси яқинида Украина эҳтиёжлари учун омборхона қуришни назарда тутади.
Венгрия расмийлари ҳукумат “МОЛ” компаниясининг омбор қуриш бўйича музокараларига рухсат бермаганини айтди. Компания эса бу фақат дастлабки келишув эканини ва лойиҳани тайёрлаш жараёни йиллар давом этишини таъкидлади. Шунингдек, “МОЛ” Европа Иттифоқининг бошқа давлатлари ва иттифоққа аъзо бўлмаган мамлакатлар манфаатлари учун Венгрияда нефт сақлаш билан шуғулланишини эслатди.