Вақтинча сақлаш ҳибсхоналарига кимлар тўсиқсиз кира олади? Қоидаларни ўзгартириш таклиф этилмоқда
Ўзбекистонда вақтинча сақлаш ҳибсхоналарига монеликсиз кириш ҳуқуқига эга шахслар рўйхатини кенгайтириш таклиф этилмоқда. Ички тартиб қоидаларида Омбудсман ўринбосари, минтақавий вакиллари ва Болалар омбудсманининг ушбу ҳуқуқини алоҳида белгилаш назарда тутилган.
**Вақтинча сақлаш ҳибсхоналарига кимлар тўсиқсиз кира олади? Қоидаларни ўзгартириш таклиф қилинмоқда**
Ички ишлар вазирининг буйруғи лойиҳаси орқали 2017-йилда тасдиқланган вақтинча сақлаш ҳибсхоналарининг ички тартиб қоидаларига қўшимча ва ўзгартиришлар киритиш режалаштирилмоқда.
Лойиҳага мувофиқ, ҳибсхоналарга монеликсиз кириш ҳуқуқига эга шахслар рўйхатига Омбудсманнинг ўринбосари, Қорақалпоғистон Республикаси, вилоятлар ва Тошкент шаҳридаги минтақавий вакиллари, шунингдек, Болалар омбудсмани ҳам қўшилади.
Амалдаги қоидаларга кўра, бундай ҳуқуқ Омбудсман, Бизнес-омбудсман, Инсон ҳуқуқлари бўйича Миллий марказ ҳамда Коррупсияга қарши курашиш агентлиги ходимларига берилган.
Таклиф этилаётган таҳрирда ушбу шахсларнинг хавфсизлигини таъминлаш ҳибсхона маъмурияти зиммасига юкланмоқда.
Лойиҳада қамоққа олинганларни тергов ҳибсхоналаридан вақтинча сақлаш ҳибсхоналарига ўтказиш тартиби ҳам аниқлаштирилмоқда.
Бундай ўтказиш тергов ҳаракатлари ёки суд мажлисларини тергов ҳибсхонаси жойлашган аҳоли пунктидан ташқарида ўтказиш зарур бўлганда, шахсни у ерга ҳар куни олиб бориш имкони бўлмаган ҳолларда қўлланади. Вақтинча ўтказиш муддати бир ой ичида кўпи билан ўн суткани ташкил этиши назарда тутилган.
Ўтказиш учун суриштирувчи, терговчи ёки прокурорнинг шахсни бошқа жойга кўчириш ҳақидаги қарори ёхуд суд ажрими асос бўлади. Бунда амалдаги қоидалардаги асослар қаторига суриштирувчининг қарори ҳам қўшилмоқда.
Шунингдек, қамоққа олинган шахсни тергов ҳибсхонасига масофа узоқлиги ёки тегишли қатнов йўллари йўқлиги сабабли олиб бориш имкони бўлмаган ҳолатларга оид қоидага ҳам суриштирувчи киритилмоқда. Бу ҳолатларда унинг прокурор билан келишилган қарори асосида шахсни вақтинча сақлаш ҳибсхонасида ўттиз суткагача сақлаш назарда тутилган.
Ушлаб туриш баённомасини расмийлаштиришга оид бандларда эса Жиноят-процессуал кодексининг 227-моддасига ҳаволаларни 225-моддасига алмаштириш таклиф қилинмоқда.
Ҳужжат ҳозирча лойиҳа бўлиб қолмоқда, унда буйруқнинг санаси ва рақами кўрсатилмаган. Қабул қилинса, у расмий эълон қилинган кундан бошлаб кучга кириши белгиланган.